नेपाली मूलका चार युवालाई बार्सिलोनाको छनौट खेलमा सहभागी हुने अवसर
टोरन्टो। क्यानाडाका नेपाली मुलका चार फुटबल खेलाडीले बार्सिलोना फुटबल क्लबको ला मासिया एकेडेमीमा खेल्ने अवसर पाएका छन्।
टोरन्टो नेपाली फुटबल क्लब (टिएनएससी) मा आवद्ध चार प्रतिभा आफ्नो प्रतिभा प्रदर्शनका लागि छनौटमा परेको भएको टिएनएससीका मुख्य प्रशिक्षक रमेश थापाले नेपाल टचलाई जानकारी दिए। टिएनएससी नेपाली समुदायको फुटबल कल्ब हो।
ला मासिया एकेडेमीमा यस्तो अभूतपूर्व अवसर पाउनेमा मिडफिल्ड सागर थापा (१६), फरवार्ड हिमाल थापा (१६), डिफेन्स सबी बस्नेत(१४) र गोलकिपर सक्षम भट्टराई(१७) छन्। उनीहरू हाल पिकरिङ फुलबल क्लबबाट पनि खेल्ने गर्छन्।
केही समय अघि टोरन्टोमा आयोजना गरिएको फुटबल क्याम्पको समयमा यि चारजना खेलाडीले बार्सिलोना क्लबको ध्यान खिचेका थियो। फुटबल खेलप्रति तिनीहरूको असाधारण कौशल, समर्पण र लगाबका कारण पनि उनीहरूले अन्य विभिन्न ठाउँबाट छनौट भएर आउने खेलाडीहरूसँग स्पेनमा प्रतिष्पर्धा गर्न पाउने भएका हुन्।
“हाम्रा खेलाडीहरू विश्वका केही महान फुटबल आइकनहरूसँगै आफ्ना सपनाहरू पूरा गर्ने बाटोमा उभिएका छन्”, प्रशिक्षक थापाले भने। मेसी, जाभी, इनिएस्टा जस्ता अन्तराष्ट्रिय खेलाडी सोही एकेडेमीमा प्रशिक्षित खेलाडी हुन्।
छनौटमा परेका केही खेलाडी आ-आफ्ना विद्यालयस्तरका खेल, अन्टारियो लिग फुटबल र नेपाली समुदायका बिचमा हुने विभिन्न खेल प्रतिष्पर्धामा अब्बल प्रदर्शन गरिरहेका खेलाडी पनि हुन्।
यी युवा खेलाडीले आगामी अक्टोबर १४ देखि २१ मा प्रतिष्ठित ला मासिया एकेडेमीमा आफ्नो खेल कौशल प्रदर्शन गर्ने छन्। त्यहाँ राम्रो प्रदर्शन गर्न सक्ने खेलाडीका लागि अवसरका थप ढोका खुल्ने छन्।
युवा खेलाडीहरूले यस्तो मौका पाउनुमा प्रशिक्षक थापाको विशेष योगदान रहेको उल्लेख गर्दै टिएनएससीका बोर्ड सदस्य रबिन घिमिरेले नेपाली समुदायमा युवा फुटबल प्रतिभालाई बढावा दिनको लागि उनको अथक परिश्रमले महत्वपूर्ण भूमिका खेलेको उल्लेख गरे।
