मार्गशीर्ष शुक्ल पूर्णिमाका दिन आज पितृको मान र प्रकृतिको सम्मानका रूपमा किरात समुदायले उधौली पर्व मनाउँदैछन् ।
उधौलीको अवसरमा किरात समुदायका याक्खाले चासुवा, सुनुवारले फोलस्यादर, राईले उधौली सकेला र लिम्बूहरूले चासोक तङनाम मनाउछन् । किरात समुदायले अन्नबाली पाकेपछि इष्टदेवतालाई चढाउने, खानका लागि अनुमति माग्ने तथा पितृलाई स्मरण गर्ने दिनलाई उधौली पर्वका रुपमा मनाउँछन् ।
बाली लगाउने बेलामा भने किरात समुदायले उभौली पर्व मनाउने प्रचलन छ ।भूमिपूजा गर्दै आज बिहानैदेखि किरात समुदायले जातीय वेशभूषामा सजिएर विभिन्न नाचसहित पर्व मनाउछन् ।
यस्तै,नेवार समुदायमा योमरी पुन्हिका रूपमा यो पर्वको महत्वव छ। अघिल्लो दिनदेखि घर र शरीर शुद्ध गरी योमरी पकाउने चलन छ। लक्ष्मी, गणेश, कुमार, कुवेरलगायतका देवी देवतालाई चढाएर मात्र खाने चलन छ। धानको भकारीमाथि यी देवी देवतालाई राखी पूजा गर्ने परम्परा नेवार समुदायमा छ।
यसैबीच, सनातन धर्मावलम्बीले धान्य पूर्णिमा मनाउँदै छन् । धानलाई लक्ष्मी वा समृद्धिको प्रतीकका रूपमा पूजा गर्दा धनधान्य वृद्धि हुने विश्वास गरिन्छ।
