निराज रानाभाट, ललितपुर । पछिल्लो समय विद्यार्थीहरु माझ प्रभावकारी सिकाईको माध्यम बन्दै गईरहेको अबाकस शिक्षामा विद्यार्थीहरुको उल्लेख्य सहभागिता हुँदै आएको छ । ललितपुरको चापागाउँ दोबाटोस्थित ब्राइट फ्युचर सेकण्डरी स्कुल एण्ड कलेजमा बाल विकास एन.सि.मास प्रा.लि. को आयोजनामा विद्यालय स्तरको अबाकस कार्यक्रम सम्पन्न भएको छ । कार्यक्रममा कक्षा १ देखि ७ सम्मका करिब ४ सय जना विद्यार्थीहरुको सहभागिता रहेको थियो । यस अबाकस प्रतियोगिताबाट छानिएका विद्यार्थीहरुले फागुनमा हुने राष्ट्रिय स्तरको अबाकस प्रतियोगितामा भाग लिन पाउने छन् ।

कार्यक्रममा आफ्नो मन्तव्य राख्दै एनसिमास संस्थाका सिइओ तेजु नेपालले यस प्रतियोगिताले विद्यार्थीहरुलाई एकाग्र बनाउन मद्दत पुग्ने र अध्यापन गराउदा ध्यान दिने बानीको विकासमा वृद्धि हुने बताए । यस्तै, उक्त कार्यक्रममा बोल्दै ब्राइट फ्युचर सेकण्डरी स्कुल एण्ड कलेजका प्रिन्सिपल बासुदेब कोइरालाले विद्यार्थीहरुको यस अबाकस शिक्षाले गर्दा पठनपाठान राम्रो भएको बताए । त्यसैगरी, कार्यक्रममा ब्राइट फ्युचर कलेजका प्रमुख किशोर अधिकारी र स्कुल एडमीन चिफले आफ्ना भनाई व्यक्त गरेका थिए । उक्त कार्यक्रममा अभिभावकहरुको उल्लेख्य उपस्तिथि रहेको थियो ।

अबाकस भनेको कम्प्युटरको इतिहासमा सबभन्दा पहिलो हिसाब गने साधनका रूपमा चिनिन्छ । यसबाट लामा र जटिल हिसाबहरू पनि धेरै छिटो र सजिलैसँग गर्न सकिन्छ । यो साधन चीन र जापानका व्यापारीहरूले अहिलेसम्म पनि प्रयोग गरिरहेका छन् । यसबाट जोड, घटाउ, गुणा र भाग सजिलैसँग गर्न सकिन्छ ।