प्रतिनिधिसभाको आइतबारको बैठक सोमबार बिहान ११ बजेसम्मका लागि स्थगित भएको छ। आइतबार बिहान ११ बजेका लागि बोलाइएको बैठकमा प्रतिपक्षी दलका सांसदहरूले नेपाल विद्युत् प्राधिकरणका कार्यकारी निर्देशकबाट कुलमान घिसिङलाई हटाएर हितेन्द्र शाक्यलाई नियुक्त गरेको विषयमा प्रधानमन्त्रीले संसद्मा जवाफ दिनुपर्ने माग गर्दै अवरोध गरे। सत्ता पक्षका सांसदहरूले बैठक सञ्चालन गर्नुपर्ने माग गरे पनि सहमति नजुटेपछि सभामुख देवराज घिमिरेले सुरुमा १५ मिनेटका लागि बैठक स्थगित गरे।

तर, दलहरूबीच सहमति नजुटेपछि सूचना टाँस गरी दिउँसो चार बजेका लागि बैठक बोलाइएको थियो। चार बजे पनि बैठक बस्न नसकेपछि फेरि सूचना टाँस गरेर सोमबार बिहान ११ बजेसम्मका लागि स्थगित गरिएको हो।

आइतबारको बैठकमा आकस्मिक, शून्य र विशेष समयमा सांसदहरूले आफ्ना धारणा राखेका थिए। साथै, अर्थ समिति सभापति सन्तोष चालिसेले ‘भन्सार विधेयक सम्बन्धी समितिको प्रतिवेदन, २०८१’ र कानुन न्याय तथा मानव अधिकार समितिकी सभापति विमला सुवेदीले ‘केही नेपाल ऐनलाई संशोधन गर्न बनेको विधेयक सम्बन्धी समितिको प्रतिवेदन, २०८१’ प्रस्तुत गरेका थिए।

त्यस्तै, संस्कृति पर्यटन तथा नागरिक उड्डयन मन्त्री बद्री प्रसाद पाण्डेले नेपाल हवाइ सेवा प्राधिकरण विधेयक २०८१, कानुन न्याय तथा संसदीय व्यवस्थामन्त्री अजय चौरासियाले नेपाल कानुन व्यवसायी परिषद् दोस्रो संशोधन विधेयक २०८१, र उपप्रधानमन्त्री तथा अर्थमन्त्री विष्णुप्रसाद पौडेलले बैङ्किङ कसुर तथा सजाय दोस्रो संशोधन विधेयक २०८० सदनमा प्रस्तुत गरेका थिए।