अमेरिकी राष्ट्रपति डोनाल्ड ट्रम्पले १२ देशका नागरिकलाई अमेरिका यात्रा गर्न पूर्ण प्रतिबन्ध लगाउने नयाँ घोषणा पत्रमा हस्ताक्षर गरेका छन्। प्रतिबन्धित देशहरूमा अफगानिस्तान, म्यानमार, चाड, कंगो गणतन्त्र, इक्वेटोरियल गिनी, इरिट्रिया, हैटी, इरान, लिबिया, सोमालिया, सुडान र यमन छन्। साथै, बुरुन्डी, क्युबा, लाओस, सिएरा लियोन, टोगो, तुर्कमेनिस्तान र भेनेजुएलाका नागरिकका लागि आंशिक यात्रा प्रतिबन्ध लागू गरिएको छ।
यो नयाँ नीति आगामी सोमबारदेखि लागू हुने छ। ट्रम्प प्रशासनले राष्ट्रिय सुरक्षाको हवाला दिँदै ती देशहरू पर्याप्त भिसा जाँच प्रक्रिया, परिचय र सुरक्षा जानकारी आदानप्रदानमा चुक्ने, वा आतंकवादी गतिविधि तथा भिसा ओभरस्टे दर उच्च भएका मुलुक भएको तर्क गरेको छ। ह्वाइट हाउसकी प्रवक्ता एबिगेल ज्याक्सनले “यी व्यवहारिक प्रतिबन्धहरूले अमेरिकालाई खतरनाक विदेशी तत्वबाट जोगाउने” बताएकी छन्।
ट्रम्पले यसअघि २०१७ मा पनि मुस्लिम बहुल सात देशका नागरिकलाई अमेरिका प्रवेशमा प्रतिबन्ध लगाएका थिए, जुन पछि अमेरिकी सर्वोच्च अदालतले २०१८ मा सदर गरेको थियो। सन् २०२१ मा पूर्वराष्ट्रपति जो बाइडेनले सो प्रतिबन्ध खारेज गरेका थिए। नयाँ प्रतिबन्धमा केही अपवादहरू कायम रहने जनाइएको छ, जस्तै अमेरिकी स्थायी बासिन्दा, ठूला खेलकुद प्रतियोगितामा सहभागी एथलेट तथा प्रमाणित पारिवारिक सम्बन्ध भएका केही व्यक्तिहरूलाई यात्रा अनुमति मिल्न सक्नेछ।
यो निर्णय पछिल्लो समय कोलोराडोमा भएको आतंकवादी आक्रमणलगायतका घटनापछि ल्याइएको हो। ट्रम्प प्रशासनले अमेरिकाको सुरक्षा र नागरिकको हितलाई पहिलो प्राथमिकता दिइएको स्पष्ट पारेको छ।
