काठमाडौं — अमेरिकी राष्ट्रपति डोनाल्ड ट्रम्प र पूर्व सरकारी दक्षता विभाग प्रमुख एलन मस्कबीच सम्बन्ध बिग्रिएको छ। मस्कले सरकारी दक्षता विभाग (डज) छाडेपछि उनीहरूबीच मतभेद बढेको हो। पहिले निकट रहेका यी दुई अहिले सार्वजनिक रूपमा आरोप–प्रत्यारोपमा उत्रिएका छन्।
मस्कले ट्रम्पको कर र खर्च सम्बन्धी विधेयकलाई “घृणित र विकृत” भनेपछि ट्रम्प असन्तुष्ट भएका छन्। ट्रम्पले मस्कलाई आफूले धेरै सहयोग गरेको तर मस्कको पछिल्लो टिप्पणीबाट आफू निराश भएको बताएका छन्। उनले भनेका छन्, “मस्कले यो विधेयकलाई राम्ररी बुझ्थे, तर अचानक उसलाई समस्या देखियो।”
त्यसको जवाफमा मस्कले सामाजिक सञ्जाल एक्समा ट्रम्पलाई “कृतघ्न” भनेका छन् र थपे, “मेरो सहयोग नभएको भए ट्रम्प चुनाव जित्न सक्दैनथ्यो।” मस्कले ट्रम्पको दोस्रो कार्यकाल जित्न आफूले ठूलो भूमिका खेलेको दाबी गरेका छन्।
यो विवादले ट्रम्प र मस्कबीचको लामो समयको सहकार्य र मित्रता अन्त्य भएको संकेत दिएको छ। मस्क ट्रम्पको प्रमुख राजनीतिक दातामध्ये एक थिए र चुनावी अभियानमा करोडौं डलर खर्च गरेका थिए। तर हालैको मतभेदपछि उनीहरूबीचको सम्बन्ध सार्वजनिक रूपमा तनावपूर्ण बनेको छ।
ट्रम्पले मस्कलाई ‘ट्रम्प डेराङमेन्ट सिन्ड्रोम’ भएको आरोप लगाएका छन् भने मस्कले ट्रम्पको नेतृत्वमा रहेका नीतिहरूको आलोचना गर्दै उनको महत्त्वाकांक्षा र व्यवहारप्रति प्रश्न उठाएका छन्। यो विवादले अमेरिकी राजनीतिमा एक प्रमुख गठबन्धनको अन्त्य भएको देखाएको छ।
