ट्यामवर्थ, अस्ट्रेलिया – नेपाली सामाजिक चलचित्र ‘उनको स्विटर’ (The Woolen Sweater) को विशेष शो १६ जुन २०२५ का दिन ट्यामवर्थस्थित Forum 6 Cinemas मा भव्य रूपमा सम्पन्न भएको छ। ६० सिट क्षमताको हलमा दर्शकहरूको उल्लेखनीय सहभागिताले हल हाउसफुल भएको छ। चलचित्र हेर्न हलको प्रवेशद्वारमा लामो लाइन देखिन्थ्यो, जसले नेपाली चलचित्रप्रतिको आकर्षणलाई पुष्टि गरेको छ।

कार्यक्रमको मुख्य प्रायोजक KTM Supermarket र Blue Flame Modern Indian Cuisine रहेका थिए। आयोजक तथा Blue Flame Modern Indian Cuisine का सञ्चालक बिकास सापकोटाले दर्शकहरूको उत्साहजनक सहभागिताप्रति धन्यवाद व्यक्त गर्दै आगामी दिनमा पनि यस्तै उत्कृष्ट नेपाली चलचित्रहरू ट्यामवर्थमा ल्याउने प्रतिबद्धता जनाएका छन्।

‘उनको स्विटर’ चलचित्रले पूर्वी नेपालको ग्रामीण परिवेश, परिवार, प्रेम र आत्मविश्वासको कथा प्रस्तुत गर्छ। चलचित्रको पोस्टर, टिकट बुकिङको सूचना र हलको वातावरणले कार्यक्रमलाई थप आकर्षक बनाएको थियो।

दर्शकहरूको उत्साह र सहभागिताले नेपाली चलचित्रले अस्ट्रेलियामा समेत राम्रो स्थान बनाउँदै गएको आयोजकले बताएका छन्।