चितवन, असार ७ – पूर्व–पश्चिम राजमार्गअन्तर्गत चितवनको राप्ती नगरपालिका–४ खहरे पुलमा शनिबार बिहान यात्रुवाहक बस र इभी माइक्रो बस एक आपसमा ठोक्किँदा ७ जनाको मृत्यु भएको छ भने १८ जना घाइते भएका छन्। धनगढीबाट काँकडभिट्टातर्फ जाँदै गरेको प्रदेश १–०१–००१ ख ३५८३ नम्बरको बस र मकवानपुरबाट नारायणगढतर्फ आइरहेको बागमती प्रदेश ०३–००१ ज २९९ नम्बरको इभी माइक्रो बस सवा १० बजे ठोक्किँदा दुर्घटना भएको हो।
मृत्यु हुनेमा मकवानपुर हटिया–३ का ५५ वर्षीय सोमप्रसाद रुपाखेती, हेटौंडा–५ की ५३ वर्षीया मैया कुमारी न्यौपाने पहाडी, नाम नखुलेका १८ देखि २५ वर्षका दुई महिला, ३५ वर्षकी गर्भवती महिला, २३ र ४० वर्षका दुई पुरुष रहेका छन्। ५ जनाको भरतपुर अस्पताल र २ जनाको पुरानो मेडिकल कलेजमा मृत्यु भएको हो। घाइतेमध्ये केहीको अवस्था गम्भीर रहेको छ र उनीहरूको भरतपुर अस्पताल, पुरानो मेडिकल कलेज तथा चितवन मेडिकल कलेजमा उपचार भइरहेको छ।
दुर्घटनामा मृत्यु र घाइते हुनेमध्ये अधिकांश इभी माइक्रो बसमा सवार थिए। प्रारम्भिक अनुसन्धानअनुसार तीव्र गति र सम्भावित ब्रेक फेलका कारण दुर्घटना भएको अनुमान गरिएको छ। घटनापछि केही समय राजमार्ग अवरुद्ध भए पनि अहिले आवागमन सञ्चालनमा आएको छ। घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।
