काठमाडौं — नेपाल राष्ट्र बैंकले आगामी आर्थिक वर्ष २०८२–८३ का लागि मौद्रिक नीति सार्वजनिक गरेको छ। शुक्रबार आयोजित कार्यक्रममा गभर्नर डा. विश्वनाथ पौडेलले नीति सार्वजनिक गर्दै आर्थिक वर्ष २०८१–८२ को पहिलो ११ महिनामा मुद्रास्फीति दर ४ दशमलव २ प्रतिशतमा सीमित रहेको जानकारी दिए। यस अवधिमा मुद्रास्फीति दर ५ प्रतिशतको लक्ष्यभन्दा कम रहन सफल भएको छ।

नयाँ मौद्रिक नीतिमा विदेशी विनिमय व्यवस्थापन, वित्तीय क्षेत्र सुधार, नियमन, भुक्तानी प्रणाली सुदृढीकरण, लघुवित्त वित्तीय पहुँच विस्तार, ग्राहक संरक्षण तथा सम्पत्ति शुद्धिकरण निवारण जस्ता महत्वपूर्ण नीति तथा कार्यक्रमहरू समावेश गरिएको छ।

गभर्नर पौडेलका अनुसार, मौद्रिक नीतिको कार्यदिशा लचिलो र विवेकपूर्ण बनाइएको छ। आगामी वर्षका लागि खुला बजार कारोबार र ब्याजदर करिडोरलाई थप व्यवस्थित गर्ने व्यवस्था गरिएको छ।

शेयरधितो कर्जामा पनि सुधार गरिएको छ। बैंक तथा वित्तीय संस्थाबाट प्रवाह गरिने मार्जिन प्रकृतिको एक ग्राहक कर्जा सीमा १५ करोडबाट बढाएर २५ करोड पुर्‍याइएको छ। यसैगरी, घरकर्जाको सीमा २ करोडबाट बढाएर ३ करोड पुर्‍याइएको छ। पहिलोपटक घर निर्माण वा खरिद गर्दा कर्जा मूल्य अनुपात ८० प्रतिशतसम्म राखिने र अन्य अवस्थामा ७० प्रतिशतसम्म कायम गरिने व्यवस्था गरिएको छ।

राष्ट्र बैंकको यस वर्षको मौद्रिक नीति लचिलो, व्यवस्थापनमुखी र समावेशी रहेको जनाइएको छ। मुद्रास्फीति नियन्त्रण, वित्तीय पहुँच विस्तार तथा कर्जा सीमा बढाउने निर्णयले अर्थतन्त्रमा सकारात्मक प्रभाव पार्ने अपेक्षा गरिएको छ।