देशभर श्रीकृष्ण जन्माष्टमी पर्व मनाउँदै विभिन्न कृष्ण मन्दिरहरूमा बिहानैदेखि भक्तजनहरूको घुइँचो देखिएको छ। पाटनको मंगलबजारस्थित प्रसिद्ध कृष्णमन्दिर, गोठाटारको नवतनधाम, बूढानीलकण्ठको इस्कोन कृष्ण मन्दिर, पशुपति परिसर, वसन्तपुर दरबार क्षेत्र तथा काठमाडौं उपत्यकाका अन्य चोक–गल्लीमा रहेका कृष्ण, नारायण र लक्ष्मीनारायण मन्दिरहरूमा भक्तजनहरूको विशेष भीड लागेको छ। श्रीकृष्ण जन्माष्टमीको अवसरमा वैदिक सनातन धर्मावलम्बीहरूले भगवान् श्रीकृष्णको पूजा, आराधना, भजन–कीर्तन, प्रवचन तथा व्रत गरेर रातभर जाग्राम बस्ने परम्परा छ। भक्तजनहरू श्रीकृष्णका जन्मोत्सवको खुशियालीमा विभिन्न स्थानमा झाँकीसहित शोभायात्रा तथा रथयात्रामा सहभागी हुन्छन्।

कहि–कहि आजै त कही–कही भोलि रथयात्रा आयोजना ।

शास्त्र अनुसार द्वापरयुगमा भाद्र कृष्ण अष्टमीको मध्यरातमा श्रीकृष्ण जन्मिएको मानिन्छ। भगवान् कृष्णले अन्याय र अत्याचार विरुद्ध मानव समुदायलाई प्रेरणा दिने शिक्षा दिएको धार्मिक विश्वास छ।
श्रीमद्भगवद्गीतामा उनले अर्जुनलाई उपदेश दिएका थिए, जुन ग्रन्थ विश्वभर अनुवाद भएको छ। बाल्यकालदेखि कृष्णले पुतना, कंश, जरासन्ध र शिशुपालजस्ता दानवी प्रवृत्तिको अन्त्य गरेका पौराणिक ग्रन्थहरूमा उल्लेख छ।
यसै उत्सवका अवसरमा विभिन्न धार्मिक संघसंस्थाद्वारा शोभायात्रा तथा रथयात्रा निकाल्ने चलन रहेको छ।