शनिबार, १६ अगस्ट २०२५ | इङ्ग्लिस प्रिमियर लिगको नयाँ सिजनमा लिभरपुलले बोर्नमाउथलाई ४–२ ले हराउँदै उपाधि रक्षा अभियानको सफल सुरुआत गरेको छ। एनफिल्डमा खेल भावनात्मक बनेको थियो, जहाँ डिओगो जोटा र आन्द्रे सिल्भाको सम्झनामा दर्शकहरू भावुक बनेका थिए। लिभरपुलका स्टार जोटा गत जुलाईमा कार दुर्घटनामा निधन भएका थिए।
खेल सुरु हुनु अघि एक मिनेट मौन राखियो तथा खेलको २० औँ मिनेटमा जोटाको जर्सी नम्बर २० सम्मानमा ताली बजाइयो। नयाँ प्रशिक्षक आर्ने स्लटले यसपटक जोडेका चार नयाँ खेलाडीलाई पहिलो पटक मैदानमा उतारेका थिए।
७० मिलियन पाउण्डमा आइन्त्राख्ट फ्रान्कफर्टबाट आएका हुगो एकिटिकेले खेलको ३७औँ मिनेटमा गोल गर्दै लिभरपुललाई अग्रता दिलाए। त्यसपछि ४९औँ मिनेटमा उनले कोडी गाक्पोलाई असिस्ट दिँदै दोस्रो गोलमा योगदान गरे।
रेफ्री एन्टोनी टेलरले दर्शकद्वारा बोर्नमाउथका फरवार्ड एन्टोइन सेमेन्जोलाई जातीय गाली गरेको भन्दै खेल रोक्नुपरेको थियो।
तर, सेमेन्जोले आत्मबल देखाउँदै ६४औँ मिनेटमा गोल गर्दै टोलीलाई खेलमा फर्काए र ७६औँ मिनेटमा काउन्टर अट्याकबाट बराबरी गोल गरे।
खेल बराबरीतर्फ जाँदै गर्दा ८८औँ मिनेटमा लिभरपुलका फेडेरिको चिएसाले पहिलो गोल गर्दै टिमलाई पुनः अग्रता दिलाए। अन्तिम समयमोहम्मद सालाहले अर्को गोल थप्दा लिभरपुलले ४–२ को प्रभावशाली जित निकालेको हो।