काठमाडौं/जनकपुर, फागुन ६, २०८२ | नेपाली कांग्रेसले आगामी फागुन २१ गतेको प्रतिनिधि सभा निर्वाचनको पहिलो ठूलो चुनावीसभा मधेश प्रदेशको राजधानी जनकपुरधाममा आयोजना गरेको छ। यो सभामा कांग्रेसले ‘प्रतिज्ञापत्र’ नामक चुनावी घोषणापत्र सार्वजनिक गर्दैछ, जुन मूलतः फागुन ३ गते काठमाडौंबाट जारी गर्ने योजना थियो। तर मधेशलाई प्राथमिकता दिने नीतिअनुरूप जनकपुरबाटै सार्वजनिक गर्ने निर्णय गरिएको हो। यस सभाबाट कांग्रेसले तीन मुख्य काम गर्दैछ –  सभापति गगनकुमार थापालाई आधिकारिक रूपमा इन्डोर्स गर्ने, प्रतिज्ञापत्र सार्वजनिक गर्ने र मधेशबाट देशव्यापी चुनावी सन्देश प्रवाह गर्ने।

मधेशमा मतदाता संख्या बढी छ र कांग्रेसको ऐतिहासिक जरो पनि यहीँ छ। तर २०६४ सालको मधेश आन्दोलनपछि महन्थ ठाकुर, विजयकुमार गच्छदारलगायत नेताहरूले नयाँ दल खोलेसँगै र उपेन्द्र यादव तथा माओवादीको उदयले मधेशको राजनीतिक समीकरण बदलियो, जसका कारण कांग्रेस यस क्षेत्रमा कमजोर हुँदै गयो। २०७९ को चुनावमा केही सुधार भए पनि एमाले मधेशको शीर्ष पार्टी बनिरह्यो। यस पृष्ठभूमिमा सभापति थापाले मधेशमा पुरानो विरासत फिर्ता ल्याउने रणनीतिक अभियान थालेका छन्। राजनीतिक विश्लेषकहरू यस सभालाई थापाको व्यक्तिगत छवि निर्माणसँग पनि जोड्छन् बीपी कोइराला, गिरिजाप्रसाद कोइराला र कृष्णप्रसाद भट्टराईजस्ता कांग्रेसी प्रधानमन्त्रीहरू मधेशबाटै निर्वाचित भएका थिए र थापा पनि त्यही पंक्तिमा उभिन चाहन्छन्।

यस सभाको अर्को महत्त्वपूर्ण पक्ष भनेको रवि लामिछाने नेतृत्वको राष्ट्रिय स्वतन्त्र पार्टी र कुलमान घिसिङको उज्यालो नेपाल पार्टीजस्ता नयाँ दलहरूको बढ्दो पपुलिस्ट लहरविरुद्धको प्रतिकार हो। थापाले काठमाडौं-४ लाई पहिलेदेखि नै असुरक्षित ठान्दै मधेशलाई सुरक्षित क्षेत्रका रूपमा रोजेको राजनीतिक वृत्तको विश्लेषण छ। मधेशमा पपुलिस्ट राजनीतिको प्रभाव तुलनात्मक रूपमा कम हुने अनुमान र टिकट वितरणमा कम विवाद भएकाले कांग्रेसले यहाँबाट भोट आकर्षित गर्न सहज हुने अपेक्षा राखेको छ।