चितवन १७ मङ्सिर : नेकपा एमालेले नयाँ सरकार गठनको लागि सबै विकल्प खुला राखेपछि नेकपा एमाले पनि सरकार गठनको लागि हौसिएको छ ।
नेकपा माओवादी केन्द्रमा नयाँ सरकार गठनको विषयलाई लिएर आज बसेको बैठकले जुनसुकै दलसँग मिलेर सरकार बनाउन सकिने निर्णय गरेपछि नेकपा एमाले पनि नयाँ सरकारको लागि अङ्कगणितको हिसाब गर्न थालेको छ ।
नयाँ सरकार गठनबारे छलफल गर्न बोलाइएको बैठकपछि माओवादी केन्द्रका उपाध्यक्ष महराले अहिलेको गठबन्धन तोडिनसकेको बताए । उनले भने, ‘गठबन्धन तोडेको छैन, सरकार गठनमा जुनसुकै दलसँग मिल्न सकिने विकल्प खुला गरेका हौँ ।’
अपेक्षाअनुसारको नतिजा नआएको माओवादी केन्द्रले स्वीकार गरेको छ । बैठकमा सहभागी एक माओवादी नेताका अनुसार जुनसुकै दलसँग मिलेर सरकार बनाए पनि पहिला माओवादी केन्द्रको नेतृत्व हुनुपर्ने धेरै नेताबाट कुराहरू आएको बताए । ती नेताले भने, ‘अहिलेको गठबन्धनका दलहरू नै मिलेर सरकार बनाए पनि पहिला माओवादीको नेतृत्वमा जानुपर्ने अडान बैठकमा केही नेताले राखेका थिए, त्यसको लागि काँग्रेस तयार नभए एमालेसँग मिलेर पनि सरकार बनाउन सकिने उनीहरूको धारणा थियो ।’
नेपाली काँग्रेसले अहिलेको गठबन्धनलाई अघि बढाउने बताइरहेको बेला गठबन्धनको प्रमुख घटक माओवादीले सबै विकल्प खुला गरेपछि काँग्रेस केही झस्केको छ भने नेकपा एमाले केही हौसिएको छ । नेकपा एमालेका केन्द्रीय एक नेताका अनुसार लोकप्रिय मतमा एमाले ठूलो दल भएका कारण नयाँ सरकार गठनमा अघि बढ्छ । ती नेताले भने, ‘माओवादी केन्द्रले सबै विकल्पलाई खुला गरेपछि एमालेलाई सरकार गठनमा केही सहज हुने देखिन्छ, एमाले पनि आफ्नो अङ्कगणितको हिसामा लागिरहेको छ ।’
उनका अनुसार सिटको आधारमा काँग्रेस ठूलो दल भए पनि समानुपातिक मतमा एमाले ठूलो दल हो, यसका लागि नयाँ सरकार गठनमा एमाले पनि गृहकार्य गरेकै छ, यद्यपि माओवादीको विकल्प खुला गर्ने निर्णयलाई एमालेले पनि आत्मसाथ गर्दै अघि बढ्छ । पूरा नतिजा आइसकेपछि नयाँ सरकार गठनको लागि अघि बढ्ने कि, प्रतिपक्षमा बस्ने भन्ने विषयमा अन्तिम निर्णय एमालेले गर्ने ती नेताको भनाइ छ ।
