निराज रानाभाट , लमजुङ : गण्डकी प्रदेशमा पर्ने लमजुङ जिल्लाको मध्यनेपाल नगरपालिकाले पालिका अन्तर्गतका सबै वडा कार्यालय पुग्ने सडक कालोपत्रे शुरु गरेको छ । १० वटा वडा रहेको सो नगरपालिकाले सबै वडा कार्यालय पुग्ने सडक कालोपत्रे शुरु गरेको हो ।
नगरपालिका अन्तर्गत सबै वडा कार्यालयमा यसअघिनै सडक सञ्जाल पुगीसकेको र उक्त सडकहरुलाई स्तरोन्नती गरि कालोपत्रे शुरु गरीएको मध्यनेपाल नगरपालिका प्रमुख रमेश कुमार पाण्डेले बताए । चालु आर्थिक वर्षमा ५ वटा वडाकार्यालय पुग्ने सडक कालोपत्रे शुरु गरेको नगरपालिकाले अर्को वर्ष सबै सडक कालोपत्रे सम्पन्न गर्ने नगर प्रमुख पाण्डेको भनाई छ ।
नगरपालिकाले वार्षिक रुपमा योजना बनाएर सबै वडा कार्यालयहरुसम्म पुग्ने सडक कालोपत्रे शुरु गरेको हो । चालु आर्थिक वर्षमा वडा नम्वर १ अन्तर्गत जिता बेसीदेखि वडा कार्यालय रहेको सातधारे सम्म कालोपत्रे शुरु भएको छ । त्यसैगरी , वडा नम्वर २ अन्तर्गत सोतीपसल देखि पाँडे गाउँ हुँदै वडा कार्यालयसम्म कालोपत्रे शुरु भएको नगरपालिकाले जनाएको छ ।
त्यसैगरी , वडा नम्वर ३ अन्तर्गत सोतिपसलकै क्याम्पस चोकदेखि वडा कार्यालय सम्म कालोपत्रे शुरु भएको छ , भने वडा नम्वर ४ अन्तर्गत दुईपिप्लेबाट समिभन्ज्याङ तर्फको र वडा नम्वर ७ मा मादि पुलदेखि लक्ष्मी बजारसम्म कालोपत्रे शुरु भएको छ । वडा नम्वर ९ अन्तर्गत भोर्लेटारदेखि बाँग्रेबेसीसम्म कालोपत्रे शुरु भएको छ , भने सो बाहेक वडा नम्वर १० मा पनि स्वाँरादेखि वडा कार्यालय सम्मको सडक कालोपत्रे सम्पन्न चरणमा रहेको नगरपालिकाले जनाएको छ ।
चालु आर्थिक वर्षमा बाँकी रहेका वडा कार्यालयसम्म पुग्ने सडकलाई आगामी आर्थिक वर्षमा बजेट विनियोजन गरी प्रत्येक वडा कार्यालयसम्म पुग्ने सडकलाई कालोपत्रे गरीने नगर प्रमुख पाण्डेले बताए ।
वडा कार्यालय पुग्ने सबै सडकलाई कालोपत्रे गर्नका लागि नगरपालिका आँफैले बजेट बिनियोजन गरेको हो । नगरपालिकाले वडा कार्यालय पुग्ने सडक बाहेक आफ्नै लगानीमा दुईपिप्ले – सोतिपसल सडकखण्ड अन्तर्गत चर्दी खोलामा मोटरेवल पुल समेत निर्माण गरेको जनाएको छ ।
नगरपालिका केन्द्र देखि प्रत्येक वडा कार्यालय पुग्ने सडक कालोपत्रे सकिएपछि नगरपालिकाले प्रत्येक बस्ती देखि वडा कार्यालय पुग्ने सडक कालोपत्रेलाई प्राथमिकतामा राख्ने जनाएको छ । साना सडक बाहेक प्रदेश र संघ सरकारको सहयोगमा पालिका भित्रका ठूला सडकलाई पनि स्तरोन्नती गर्ने योजना रहेको नगरपालिका प्रवक्ता रामचन्द्र भण्डारीले जानकारी दिए ।
