गणित शिक्षा परिषद्, चितवनले आयोजना गरेको जिल्लाव्यापी दुई दिने वृहत गणित हाजिरीजवाफ (Mathematics Quiz) मा नारायणी नमुना माध्यमिक विद्यालय प्रथम, वाल्मीकि शिक्षा सदन द्वितीय र नारायणी पब्लिक इङ्गलिस स्कुल तृतीय स्थान हासिल गर्न सफल भएका छन् ।
चितवन जिल्लाका सातै पालिकामा गणित हाजिरीजवाफ (Mathematics Quiz) संचालन गर्ने आयोजना भएतापनि राप्ति नगरपालिकाको भण्डारा माध्यमिक विद्यालय भण्डारामा, खैरहनि नगरपालिकाको ग्लो साइन एकेडेमीमा, रत्ननगर नगरपालिकाको स्काई राइडर इङ्गलिस स्कुलमा, इक्षाकामना गाउँपालिकाको प्रगती पाठशाला, माडि नगरपालिकाको जनकल्याण माध्यमिक विद्यालयमा र भरतपुर महानगरपालिकाको वाल्मीकि शिक्षा सदनमा पहिलो चरणको गणित हाजिरीजवाफ (Mathematics Quiz) सम्पन्न भएको थियो तर विद्यालयहरुको आफ्नै आन्तरिक क्रियाकलाप भएको हुँदा कालिका नगर पालिकामा उक्त कार्यक्रम हुन सकेन ।

प्रत्येक पालिकामा लिखित राउण्ड पश्चात ६/६ टिमको एक समुह बनाई सम्पन्न पहिलो दिनको दुई चरणको प्रतियोगिताबाट विभिन्न एक्काइस समुह छनौट गरि दोश्रो दिन पौष १० गते सेमि फाइनल र फाइनल राउण्डको क्वीज भरतपुरको अङ्कुरम् एकेडेमीमा संचालन गर्दै कार्यक्रम सम्पन्न भएको परिषद्का कोषाध्यक्ष प्रकाश सुवेदीले जानकारी गराउनुभयो ।

फाइनल राउण्डमा पुग्ने सबै ६ वटा टिमलाई नगद पुरस्कार एवं सर्टिफिकेटले पुरस्कृत गरेको परिषद् ले प्रथम पुरस्कार रु ५०००, द्वितिय पुरस्कार रु ४००० र तृतीय पुरस्कार रु ३००० ले पुरस्कृत गर्नुका साथै सान्त्वना पुरस्कार स्वरुप अन्य तीन टिमलाई प्रति टिम रु २००० ले सम्मान गरेको थियो ।

गणित शिक्षा परिषद्का अध्यक्ष देवीप्रसाद पोडेलको सभापतित्व, केन्द्रीय सदस्य गुरुप्रसाद पौडेलको प्रमुख आतिथ्यता र संस्थापक अध्यक्ष कृष्ण अर्यालको संयोजकत्वमा सम्पन्न प्रतियोगितामा प्याब्सन चितवनका उपाध्यक्ष भानु अर्याल, शैक्षिक प्रशासन माहाशाखा, भरतपुरका अधिकृत दिपक सिग्देल, भरतपुर माहानगर गणित विषय संयोजक टेकनाथ पौडेलले कार्यक्रम भब्य रुपमा सम्पन्न भएको र निरस बन्दै गइरहेको गणित विषयको स्तर उठाउन यस्ता कार्यक्रम संचालन गर्नुपर्ने भन्दै कार्यक्रमको प्रशंसा गर्नु भएको थियो ।
गणित शिक्षा परिषद् चितवन शाखाका सचिव गोविन्द पौडेलले संचालन गर्नुभएको कार्यक्रममा निवर्तमान अध्यक्ष गेहेन्द्र राज विष्ट, उपाध्यक्ष वसन्त राज लामिछाने, अङ्कुरम् एकेडेमीका प्राचार्य सुमन पौडेल लगायतले विद्यार्थीको प्रशंसा गर्दै गणित क्वीजमा सहभागि प्रतियोगिहरु उत्साहित भएको देख्दा आफुहरु प्रभावित भएको पनि बताउनु भयो ।