काठमाडौं, पुस १८ गते । टोलीका प्रभावशाली खेलाडी खेलाडी लियोनल मेस्सी र नेयमारविनै प्रतिस्पर्धा गरेको पेरिस सेन्ट जर्मेन (पीएसजी) ले फ्रेन्च लिग वान फुटबलमा पहिलो हार खेपेको छ । कतार विश्वकप पछि सुरु भएको लिगमा आइतबार राति पीएसजी लेन्ससँग ३–१ गोलले स्तब्ध भयो ।
विश्वकप पछि आराम गरिरहनुभएका अर्जेन्टिनी स्टार मेस्सी फ्रान्स पुग्नुभएको छैन । ब्राजिलियन स्टार नेयमार भने कार्डका कारण यस खेलमा खेल्नु भएको थिएन । पाहुना टोली पीएसजी खेलको सुरुवातमै पछि परेको थियो । लेन्सको जितमा प्रजेमिस्लाव फ्रान्कोब्स्कीले पाँचौं, लोइस अोपेन्डाले २८औं र एलेक्सिस क्लाउड मरिसले ४७औं मिनेटमा गोल गर्नुभयो ।
यसअघि पीएसजीका हुगो एकिटिकेले आठौं मिनेटमै एक गोल फर्काए पनि टोलीको हार टरेन । हारे पनि पीएसजी शीर्षस्थानमा यथावत् छ । पीएसजीको १७ खेलबाट ४४ अङ्क छ । विजेता लेन्स ४० अङ्कसहित दोस्रो स्थानमा छ । एजेन्सी
