राष्ट्रिय स्वतन्त्र पार्टी (रास्वपा)ले सरकारमा सहभागी हुने मन्त्रीको छनौट गर्ने जिम्मा सभापति रवि लामिछानेलाई दिएको छ।
रास्वपाको सोमबार बसेको संसदीय दलको भर्चुअल बैठकले पार्टीबाट सरकारमा सहभागी हुने मन्त्री छान्ने जिम्मा सभापति लामिछानेलाई दिएको हो।
रास्वपाले आफ्नो भागमा पर्ने मन्त्रालयमा विज्ञता हेरेर मन्त्रीको टुंगो लगाउने यसअघि नै निर्णय गरिसकेको छैन। रास्वपाले तीन वटा मन्त्रालय पाउने सत्ता गठबन्धनमा सहमति छ। रास्वपाबाट सभापति लामिछाने उपप्रधानसहित गृहमन्त्री छन्।
रास्वापाका एक नेताका अनुसार गृह मन्त्रालय, श्रम रोजगार तथा सामाजिक सुरक्षा मन्त्रालय, शिक्षा, विज्ञान तथा प्रविधि मन्त्रालय पाउने भएको हो । रास्वपाका सभापति लामिछाने उपप्रधानमन्त्री तथा गृहमन्त्री भइसकेका छन् ।
श्रममा डोलप्रसाद अर्याल र शिक्षामा शिशिर खनाललाई पठाउने रास्वपाको तयारी छ । यद्यपि, निर्णय भने भएको छैन । ‘विज्ञताका आधारमा मन्त्री छनोट गर्छौं । मन्त्रीको नाम टुंगो लागेको छैन,’ प्रवक्ता डा. मुकुल ढकालले भने ।
यदि श्रम र शिक्षा मन्त्रालय पाएमा रास्वपाको वैदेशिक विभाग पार्टी उपसभापतिसमेत रहेका अर्यालले हेर्दै आएका छन् । त्यसैले अर्यालको सम्भावना धेरै छ । त्यसैगरी, खनाल लामो समयदेखि शिक्षाक्षेत्रमा काम गर्दै आएका छन् । उनीसँग टिच फर नेपालमा रहेर शिक्षाक्षेत्रमा काम गरेको अनुभव छ ।
अर्याल समानुपातिक सांसद हुन् भने खनाल काठमाडौं क्षेत्र नम्बर ६ बाट प्रत्यक्ष निर्वाचित हुन् । रास्वपाले एक राज्यमन्त्रीसमेत पाउनुपर्ने माग गरेको छ । यदि स्वास्थ्य राज्यमन्त्री पाएको खण्डमा डा. तोसिमा कार्कीलाई बनाउने रास्वपाको तयारी छ । ‘स्वास्थ्य राज्यमन्त्रीमा हाम्रो दाबी हो । तर, दलहरूबीच सहमति भएको छैन,’ रास्वपाका एक नेताले भने । रास्वपाले उपभामुखमा पनि दाबी गरेको छ । रास्वपालाई उपसभामुख दिन दलहरू सहमत छन् ।
