विश्वभर महामारीको रूपमा फैलिइरहेको कोभिड–१९ भाइरस को प्रभावबाट नेपाल पनि अछुतो हुन नसकेको र देशैभर भाइरसको प्रभाव दिनानुदिन बढ्दै गइरहेको हालको विषम परिस्थितीमा स्वास्थ्य सामग्रीको अभाव भइरहको अवस्थालाई मध्येनजर गर्दै नेपाल रेडक्रस सोसाइटी (नेरेसो)ले नेपाल सरकार स्वास्थ्य तथा जनसंख्या मन्त्रालयमा आज एक कार्यक्रम आयोजना गरी ९० थान अक्सिजन कन्सन्ट्रेटर सहित व्यक्तिगत सुरक्षाका सामग्रीहरु हस्तान्तरण गरेको छ ।

महिला, बालवालिका तथा जेष्ठ नागरिक मन्त्रालयको सहजीकरणमा स्वास्थ्य तथा जनसंख्या मन्त्रालयलाई कोभिड–१९ प्रतिकार्यका लागि हस्तान्तरण गरिएका स्वास्थ्य सामग्रीहरु सोसाइटी अफ चाइनाले सहयोग स्वरुप प्रदान गरेको थियो । मानवीय संकटको यस कठिन घडीमा नेपाल रेडक्रस सोसाइटी र नेपाल स्थित रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासंघ (फेडेरेशन)को पहलमा प्राप्त सामग्री नेपाल रेडक्रस सोसाइटीका अध्यक्ष डा. नेत्रप्रसाद तिम्सिनाले महिला, बालवालिका तथा जेष्ठ नागरिक मन्त्री जुली कुमारी महतो मार्फत् स्वास्थ्य तथा जनसंख्या मन्त्री हृदयश त्रिपाठीलाई हस्तान्तरण गर्नु भएको थियो ।

नेपाल रेडक्रस सोसाइटी सदैव मानवीय सहायतामा अग्रसर रही आएको स्मरण गर्दै स्वास्थ्य तथा जनसंख्या मन्त्री हुदयश त्रिपाठील भन्नुभयो, ‘‘नेपाल रेडक्रस नेपाल सरकारको सहयोगी निकाय हो । यसले कठिन घडिमा गर्दै आएको सेवा निकै महत्वपूर्ण छ ।” नेपाल रेडक्रसबाट प्राप्त स्वास्थ्य सामग्री ग्रहण गर्दै मन्त्री त्रिपाठीले बताउनु भयो, ‘‘यिं सामग्रीहरु संक्रमितको उपचारका लागि प्रयोग गरिनेछन् ।”

देशको सबैभन्दा ठूलो मानवीय सञ्जाल भएको परोकारी संस्था नेपाल रेडक्रसले मानवीय संकटका समयमा आफ्ना स्वयंसेवक तथा कर्मचारीको सहयोगमा संस्थाले सदैव नेपाल सरकारको सहयोगी भूमिका निर्वाह गर्दै आएको बताउँदै नेपाल रेडक्रस सोसाइटीका महामन्त्री पिताम्बर अर्यालले बताउनु भयो, ‘‘हाल नेपाल रेडक्रस सोसाइटीले विपद् प्रतिकार्यमा विभिन्न रणनैतिक योजना सहित गोदामहरूको स्थापना गरी राहत सामग्री वितरण गर्दै आएको छ भने विपद पूर्वतयारी र पुनर्लाभको क्षेत्रमा पनि प्रभावकारी सेवा पुर्याउँदै आएको छ ।

स्वास्थ्यको क्षेत्रमा एक केन्द्रीय, पाँच प्रादेशिक, १९ जिल्ला स्तरीय, ४६ आकस्मिक रक्तसञ्चार सेवा र अस्पतालको समन्वयमा ४६ गरी जम्मा ११६ रक्तसञ्चार केन्द्रहरूबाट सेवा पुर्याउँदै आएको छ भने दुईवटा आँखा अस्पताहरूको माध्यमबाट आँखा उपचार सेवामा भूमिका खेल्दै आएको छ । कोभिड–१९ को प्रतिकार्यमा अग्रणी भूमिका निर्वाह गर्नुको साथै २४७ वटा एम्बुलेन्स सेवा, प्राथमिक उपचार सेवा र स्वास्थ्य सम्वन्धी जनचेतना जगाउने कार्यमा समेत सरकारको सहयोगीको रूपमा भूमिका खेल्दै आएको छ ।”

आफ्नो बृहत मानवीय सञ्जाल मार्फत् कोभिड–१९ को पहिलो लहर र हालको दोस्रो लहरमा पनि नेपाल रेडक्रसका स्वयंसेवक तथा कर्मचारी अग्रपंतिमा खटिइरहनुभएको समेत महामन्त्री अर्यालले स्पष्ट पार्नुभयो ।