रक्तदान जीवनदान, भन्ने भनाइ एकदमै प्रचलित छ किनभने हामीले दिएको रगतले कोहि/कसै बिरामीको उपचारमा प्रयोग हुन्छ र उसले नयाँ जीवन पाउन सक्छ। चितवनमा रगतको अभाव दिन-प्रतिदिन बढ्दै गएको पाइन्छ। रगत व्यवस्थापनको जिम्मा पाएको रक्तसंचार संस्था (नेपाल रेडक्रस ब्लड ब्याङ्क) ले पनि माग अनुसारको आपूर्ति गर्न सकिरहेको छैन।
भरतपुर सरकारी अस्पताल र बिपी कोइराला मेमोरियल क्यान्सर अस्पतालमा छुट्टा-छुट्टै ब्लड ब्याङ्क भएतापनि बिरामीले रगतको लागि गुहार गर्नुपरिरहेको लियो क्लबका सदस्यहरु बताउँछन् र लियोबाट नै सक्दो सहयोग गरिरहेको बताएका छन्।
सामाजिक सेवासहित अन्य आपत विपतमा सहयोग गर्दै आएको लियो क्लबले रगत व्यवस्थापनमा उल्लेखनीय सहयोग गर्दै आइरहेको छ। यसरी माग अनुसारको रगत व्यवस्थापन गर्नको लागि भोलि देखि साताव्यापी घुम्ती रक्तदान शिविरको आयोजना गरेको छ। भोली असार १ देखि ७ गते सम्म हुने शिविरमा भरतपुर, गैंडाकोट, रत्ननगर, पर्सा र वीरेन्द्रनगरका विभिन्न स्थानमा गर्न लागिएको लियो जिल्ला ३२५ वि २ नेपाल एरिया ३ का प्रमुख लियो पुरुषोत्तम सुबेदीले बताउनु भएको छ।
लियो सहित रगत व्यवस्थापनामा सहयोगी स्वयंसेवी संस्थाहरु ब्लड फर लाइफ चितवन र ब्लड फर नेपालको संयुक्त आयोजनामा हुने रक्तदान शिविरमा उल्लेखनीय सहभागिता हुने पनि आश पनि गरिएको छ।
