नया पत्रिका र कान्तिपुर दैनिक पत्रिकामा प्रकाशित “कोरोनागार्डले सहज बनाउदै कार्यालय संचालन ” नामक भ्रामक विज्ञापन प्रति स्वास्थ्य तथा जनसंख्या मन्त्रालय अन्तर्गत रास्ट्रिय स्वास्थ्य शिक्षा, सूचना तथा संचार केन्द्रको गम्भीर ध्यानकर्षण भएको जनाएको छ।

मन्त्रालयकी वरिष्ठ स्वास्थ्य शिक्षा प्रशासक शिला श्रेष्ठद्वारा जारी पत्रमा आम जनताको स्वास्थ्यमा प्रत्यक्ष असर हुनेगरी छापिएका यस्ता गलत तथा भ्रामक विज्ञापनले कोरोना संक्रमण रोकथाम तथा नियन्त्रणमा प्रभाव पारी कोरोना संक्रमण बढ्न सक्ने तर्फ़ पनि ध्यान दिन आग्रह गर्नु भएको छ।

यस्ता भ्रामक तथा गलत विज्ञापन/समाचार प्रकाशन गर्नु जनस्वास्थ्य सेवा ऐन २०७५ को दफा ४५ को उपदफा (२) विपरित भएको हुँदा उक्त स्थानमा सो विज्ञापनको खण्डन गरी कोभिड १९ रोकथाम तथा नियन्त्रणका लागि जनस्वास्थ्यका मापदण्डहरु, मास्क लगाउने, भौतिक दुरी कायम गर्ने तथा साबुन पानीले हात धुने वा स्यानिटाइजरको प्रयोग गर्ने सम्बन्धि सन्देशहरु प्रकाशित गर्न श्रेष्ठले अनुरोध गर्नु भएको छ भने आगामी दिनहरुमा सचेत रही गलत समाचार प्रकाशन नगर्न पनि अनुरोध गर्नु भएको छ।