काठमाडौं । अनशनरत डाक्टर गोविन्द केसीसँगको वार्ता निष्कर्षमा नपुगेपछि सरकारमाथि उनको ज्यान लिन खोजेको आरोप लागेको छ । डाक्टर गोविन्द केसीको तर्फबाट गठित वार्ता टोलीका संयोजक डा. जीवन क्षेत्रीले विज्ञप्तिमार्फत् त्यस्तो आरोप लगाउँदै संघर्षको आग्रह गरेका हुन् ।

‘सत्याग्रहीको ज्यान लिने सरकारको हिंस्रक चरित्रविरुद्ध निरन्तर संघर्ष गर्दै नेपालमा लोकतन्त्रको मर्म बचाउन राजनीतिक दलहरुलाई समेत अपिल गर्दछौं,’ डा. क्षेत्रीले विज्ञप्तिमार्फत् भनेका छन् । डा. केसी वार्ताका लागि लचिलो हुँदा समेत सरकारी वार्ता टोलीले विगतको सम्झौता कार्यान्यन सुनिश्चत नगरेको उल्लेख छ ।

विज्ञप्तिमार्फत् देशभर प्रदर्शनका कार्यक्रम सुचारु गर्न तथा काठमाडौंमा मध्यान्ह १२ बजेबाट प्रदर्शनको आव्हान गरिएको छ । माइतीघर मण्डलमा अहिले प्रदर्शन भइरहेको छ ।

२२ असोजमा बनेको मस्यौदामा गम्भीर हेरफेरसहितको नयाँ मस्यौदा लिएर सरकारी टोली प्रस्तुत भएको भन्दै यसलाई राजनीतिक नेतृत्वको गैरजिम्मेवारी र संवेदनहीनता मात्र नभई बेइमानी र वार्ता प्रक्रियालाई अनिश्चितकालसम्म लम्ब्याएको भनिएको छ । विज्ञप्तिमा भनिएको छ, ‘डा. केसीको ज्यानै लिने नियत समेत उदांगो भयो ।’