चितवनमा इन्टरनेट सेवा प्रदायक कम्पनी र विद्युत प्राधिकरणबीच झगडा हुँदा त्यसको असर भने इन्टरनेट प्रयोगकर्ताहरूलाई पर्ने सम्भावना बढ्दै गएको छ। नेपाल विद्युत प्राधिकरणले पोल भाडा नतिरेका इन्टरनेट सेवा प्रदायक कम्पनीलाई कारवाही गर्दै आएको छ विद्युत प्राधिकरणबाट कारवाही भोगेका इन्टरनेट सेवा प्रदायक कम्पनीहरूले भने विद्युतका कारण इन्टरनेट सेवा अवरूद्ध गरिदिने भन्दै त कहिले सेवा शुल्क बढाइदिने भन्दै सेवाग्राहीमाथि धम्की दिइरहेका छन्।
पोल भाडा नतिर्ने इन्टरनेट कम्पानीको सामान जफत गरेर विद्युत प्राधिकरणले कडाइ गर्दै आएको छ। हालसम्ममा इन्टरनेटको फाइबर तार जोड्ने उपकरण स्पिल्सर १३ वटा जफत गरिसकेको छ। पोल भाडा तिरेका इन्टरनेत सेवा प्रदायक कम्पनीले भने जफत भएका उपकरण पनि फिर्ता लगिसकेका नेपाल विद्युत प्राधिकरण भरतपुर वितरण केन्द्रका इञ्जिनियर राजेन्द्र पौडेलले जानकारी दिए। भाडा सम्झौताका लागि इन्टरनेट सेवा प्रदायक कम्पनीलाई पटकपटक पत्राचार गर्दा पनि सम्पर्कमा नआएपछि प्राधिकरणले इन्टरनेटको तार बिस्तारमा रोक लगाएको उनले बताए। सम्झौता गरी पोल भाडा तिर्न विद्युत प्राधिकरणले भदौ १ गते नै सूचना प्रकाशन गरेको थियो।
तर, इन्टरनेट सेवा प्रदायक कम्पनीहरुले भने विद्युत प्राधिकरणले इन्टरनेट कम्पनीको सामान लुटेको दाबी गर्दै आएको छ। विद्युतले नियतवस नै इन्टरनेटका सामान लुटेर लैजाने, इन्टरनेटको तार (फाइबर) काट्ने, इन्टरनेट मर्मत गर्दा अवरोध पुर्याउने जस्ता काम गरेर दूरसञ्चार ऐन–२०५३ लाई उल्लंघन गरेको आरोप लगाएको छ। इन्टरनेट सेवा प्रदायक संघ नेपालका अध्यक्ष सुधीर पराजुलीले मंगलबार विज्ञप्ति जारी गर्दै भरतपुर क्षेत्रमा इन्टरनेट अवरुद्ध भए त्यसको सम्पूर्ण जिम्मेवारी विद्युत प्राधिकरणले लिनुपर्ने बताए।
विद्युत प्राधिकरणले पोल भाडादर बढाएपछि भाडा समायोजनबारे पनि सम्बन्धित मन्त्रालयमा छलफल भइरहेको विज्ञप्तिमा भनिएको छ। केही दिनअघि पनि संघले विज्ञप्ति निकालेर प्राधिकरणले बढाएको पोल भाडाको भार सेवाग्राहीलाई पर्न जाने भन्दै इन्टरनेट सेवाग्राहीलाई आतंकित पार्ने काम गरेको थियोे।
अहिले भने त्यस भनाइलाई केही समायोजन गर्दै विज्ञप्तिमा भनिएको छ, ‘नेपाल विद्युत प्राधिकरणले अचाक्ली पोल भाडादर वृद्धि गरेपछि ग्राहक महानुभावहरूमा वृद्धि भएको भाडादरको कुनै पनि भार नपरोस् भन्ने पवित्र हेतुका साथ उच्चस्तरीय गरिरहेका थियौँ। र नेपाल विद्युत प्राधिकरणले डिजिटल नेपाल, कोभिड–१९ को अवस्था र आम उपभोक्तामा पर्ने असरलगायतका केहीको पनि ख्याल नराखी यस किसिमको गतिविधि गर्नाले यो समस्या सृजित भएको हो। यसकारण इन्टरनेट अवरूद्ध भएमा नेपाल विद्युत प्राधिकरणकै कारणले हुनेछ भनी हाम्रा उपभोक्तालाई सुचित गर्दछौँ।’
