नेपाली कांग्रेसका केन्द्रीय सदस्य डाक्टर शेखर कोइरालाले पार्टीको चौधौं महाधिवेशनबाट गुट र गिरोह समाप्त पार्नुपर्ने बताएका छन्।
पार्टीको वडा अधिवेशन सुरु भएसँगै शुक्रबार अपिल जारी गर्दै कोइरालाले कांग्रेसलाई विश्वसनीय र भरोसायुक्त एक नम्वरको पार्टी बनाउनुपर्नेमा जोड दिएका छन्।
‘हामीले विगतमा पार्टी भित्र गुट र विभाजनको स्थायी चरित्रका रुपमा बसेको संस्कारलाई हटाउन सकेनौँ। यही कारण आमनिर्वाचनमा हामी कम्युनिष्टभन्दा कमजोर हुन पुगेका हौँ।’ कोइरालाले अपिलमा उल्लेख गरेका छन्, ‘पार्टी भित्र नयाँ संस्कार र पद्धति निर्माणको लागि पर्खन हामीसँग समय छैन। उत्सवको रुपमा आएको चौधौँ महाधिवेशनलाई हामी ‘गुट र गिरोह’ समाप्त गर्न सफलीभूत हुनुपर्नेछ।’
आफूहरुको सामान्य गल्ती र कमजोरीले पनि कांग्रेसको इतिहासप्रति न्याय गन नसक्ने परिस्थिति बन्न सक्ने भन्दै कोइरालाले भविष्य पुस्ताका लागि कांग्रेस असान्दर्भिक हुनसक्ने चेतावनी पनि दिएका छन्।
‘कांग्रेसको इतिहास जति गौरवशाली छ, वर्तमान आफ्नै इतिहास सुहाउँदो छैन। यसैले पार्टीलाई पुनः गौरवशाली बनाउने दृढ संकल्पका साथ हामी सबै महाधिवेशनमा सरिक हुनुपर्नेछ,’ उनले लेखेका छन्, ‘आन्तरिक लोकतन्त्रलाई सबल बनाउन स्वस्थ प्रतिस्पर्धा अनिवार्य हुन्छ। यसले पार्टी भित्र ताजा अक्सिजनको सञ्चार हुन्छ, पार्टीलाई चलायमान बनाउँछ।’
