चितवनमा गुड फार्मेसी प्राक्टिस् ‘जिपीपी’ अर्थात् ‘असल फार्मेसी अभ्यास’ सम्बन्धी एकदिने कार्यशाला सम्पन्न भएको छ । नेपाल फार्मेसी संघ चितवन शाखाको आयोजनामा आइतवार भरतपुरमा सो कार्यशाला सम्पन्न भएको हो ।
कार्यक्रमका फार्मेसीमा असल अभ्यास कसरी गर्ने ? बिरामीको उपचारमा फर्मासिष्टको कस्तो भूमिका रहन्छ ? असल फार्मेसी अभ्यासका उदाहरण, त्यसका फाइदाहरू, औषधि सम्बन्धी परामर्श गर्दा ध्यान दिनुपर्ने कुराहरू, अस्पताल र सामुदायिक फार्मेसीमा फर्मासिष्टको कस्तो भूमिका रहन्छ ? कोरोना महामारी तथा अन्य सरूवा रोग नियन्त्रणमा फार्मेसी जनशक्तिले खेल्नुपर्ने भूमिकालगायतका विषयमा वरिष्ठ फर्मासिष्ट सफीउर रहमान अन्सारी र फर्मासिष्ट रमेश पौडेलले सहजीकरण गरेका थिए ।
संघका चितवन शाखा अध्यक्ष फर्मासिष्ट विनोद पन्तको अध्यक्षता एवम् भरतपुरस्थित बीपी कोईराला मेमोरियल क्यान्सर अस्पतालका वरिष्ठ कन्सलटेण्ड सर्जन डा. गंगा सापकोटाको प्रमुख आतिथ्यमा सो कार्यक्रम भएको थियो । कार्यक्रममा संघका केन्द्रीय महासचिव युवराज भुषाल, श्री मेडिकल एण्ड टेक्निकल कलेज, भरतपुरका प्राचार्य नन्दकिशोर भट्ट, संघका केन्द्रीय सदस्य अजामिन ढकाललगायत विभिन्न अस्पताल फार्मेसी तथा सामुदायिक फार्मेसीमा कार्यरत फर्मासिष्ट र सहायक फर्मासिष्ट गरी झन्डै पचास जनाको सहभागिता रहेको संघका सचिव प्रभात पौडेलले जानकारी दिए ।
