नेपाली कांग्रेसको आशन्न चौधौं महाधिवेशन केन्द्रिय कार्यसमितिको यही मङ्सिर २४ गतेदेखि सुरु हुँदै छ। वडा, क्षेत्र, पालिका र प्रदेश तहका निर्वाचनहरु सम्पन्न भएपछी सबैको ध्यान अहिले केन्द्रिय महाधिवेशन तिर पुग्न थालेको छ। केहि विवादित जिल्लाहरु बाहेक सबैमा जिल्लास्तरका निर्वाचन पनि सम्पन्न भैसकेका छन् भने चितवनमा एमाले अधिवेशनका कारण स्थगित हुन पुगेको जिल्ला अधिवेशन यही मङ्सिर १९ गते आइतबार हुने जानकारी प्राप्त भैसकेको छ।

चितवनमा पनि अहिले जिल्ला अधिवेशनका लागि नेताहरु भोट माग्न क्षेत्रीय प्रतिनिधिहरु भेट्दै आफ्नो पक्षमा मतदान गर्न दौडधुप गरिरहेका छन्। साथै वर्तमान सभापति जितनारायण श्रेष्ठले भने आज एक कार्यक्रम गर्दै केन्द्रिय सदस्यमा आफ्नो उम्मेद्वारी हुने जानकारी गराएका हुन्। झन्डै साढे पाँच वर्षको जिल्ला सभापतिको जिम्मेवारी संहाल्दै जिम्मेवारी हस्तान्तरण गर्ने अवस्थामा पुगेका श्रेष्ठले आफ्नो उम्मेद्वारीमा सहयोग गर्न सबै महाधिवेशन प्रतिनिधिहरुलाई अनुरोध गरेका थिए। श्रेष्ठले भने “काँग्रेसको ७५ वर्षको इतिहाँसमा अहिले सम्म केन्द्रिय सदस्य पाउन सकेको छैन । यो तोड्नका लागि सबै एक भएर निर्वाचनमा होमिनु जरुरी छ ।” जनजाति कोटामा उम्मेद्वारी दिएका श्रेष्ठले सबैलाई सहयोग गर्न पनि अनुरोध गरेका छन्।

अहिले सम्म केन्द्रिय राजनीतिमा प्रभाव पार्ने चितवन कांग्रेसबाट कुनै पनि केन्द्रिय सदस्य नपर्नु हामी सबै चितवनबासी कांग्रेसीहरुलागि पनि लज्जास्पद हो। वर्तमान जिल्ला सभापति श्रेष्ठ सहित पुर्व सभापति टेक प्रसाद गुरुङ र युवा नेता दिनेश कोइरालाको पनि केन्द्रिय सदस्यमा उम्मेद्वारी रहेको छ।