निराज रानाभाट , भरतपुर , चितवन : चितवनको भरतपुर महानगरपालिकाको प्रमुख पर्यटकीय गन्तव्य पटिहानीस्थित भरतपुर – २२ , धनौजीमा निर्माणाधीन देशकै ठूलो कभर्ड हल निर्माण कार्य द्रुतगतिमा भइरहेको छ ।
देशकै १०० औँ पर्यटकीय गन्तव्यभित्र पर्न सफल र पर्यापर्यटनको उत्कृष्ट स्थानको रुपमा चिनिँदै गइरहेको पटिहानीलाई चिनाउने अर्को माध्यम खेलकुद बनेको पर्यंटक विकास समितिका अध्यक्ष शङ्कर थपलियाले बताए । यहाँ भएको जिल्लाकै ठूला अन्तर्राष्ट्रियस्तरको पद्मोदय भलिबल प्रतियोगिताले देशविदेशमा पटिहानीको नाम चिनाएको बताउँदै उनले पर्यापर्यटनसँगै खेलकुद पर्यटनको विकासका लागि पटिहानीको ढोका खुलेको बताए ।
गत वर्षदेखि नै निर्माण सुरू गरिएको कभर्ड हलको १ करोडबराबरको फाउन्डेसनको काम सम्पन्न भइसकेको छ । अहिले थप ७ करोडबराबरको काम अघि बढेको छ । अहिले ट्रष्ट राख्ने काम भइरहेको छ । करिब ८ करोड लागतमा निर्माणाधीन यो आयोजना अबको २ महिनाभित्र सम्पन्न हुने थपलियाले बताए ।
गत वर्षदेखि निर्माण सुरूवात गरिएको उक्त योजनाको १ करोडबराबरको फाउन्डेसनको काम यसअघि नै सम्पन्न भइसकेको छ भने हालै बागमती प्रदेश सरकार, सामाजिक विकास मन्त्रालयबाट बहुवर्षीय योजनाअन्तर्गत आगामी २०७८ पुस मसान्तसम्म काम सम्पन्न गर्ने गरी ७ करोडबराबरको कार्तिक ३ गते टेन्डर आह्वान भएको भरतपुर – २२ का वडा अध्यक्ष महतोले जानकारी दिए । करिब २,२०० जना दर्शक क्षमता रहने उक्त कभर्ड हलमा विभिन्न इन्डोर खेलहरु सञ्चालन हुनेछन् ।
