पाकिस्तानको दक्षिणी बन्दरगाह शहर कराँचीस्थित शनिवार दुई तले भवनमा विष्फोट हुँदा कम्तीमा १४ जनाको ज्यान गएको छ । अन्य १२ जना घाइते भएको प्रहरी र अस्पताल स्रोतले बताएको छ ।
घटनामा घाइते भएका अधिकांशको अवस्था गम्भीर रहेको उपचार गराइरहेको अस्पताल शहीद मोहम्मद बेनजिर भुट्टो इन्स्टिच्युट अफ ट्रमाले जनाएको छ ।
ढल निकास र ग्यासको लाइन रहेको साँघुरो जलधारामा बैंकको भवन निर्माण भएकोले ढल निकासको लाइनमा ग्यास जम्मा भएको वा ग्यासको पाइपलाइनमा विष्फोटक पदार्थ राखेर विष्फोट भएको हो भन्ने यकिन गर्न कठिन भएको प्रहरीले जनाएको छ ।
विष्फोटको कारण भने ग्यास चुहावट रहेको बताइएको छ । उक्त भवनमा एक निजी बैंक र अन्य थुप्रै कार्यालयहरू रहेको अन्तर्राष्ट्रिय समाचारहरुले उल्लेख गरेका छन् । विष्फोटमा परेकाे भवन आंशिक रुपमा ध्वस्त भएको छ । थुप्रै व्यक्तिहरु अझै पनि भग्नावशेषमा फसेका छन् । उद्धार टोली फसेका मानिसहरूको खोजीका लागि भग्नावशेष हटाउन प्रयासरत छ ।
