भर्खरै सम्पन्न नेपाली कांग्रेसको केन्द्रिय महाधिवेशनमा शेरबहादुर देउवाको नेतृत्वमा नयाँ कार्यसमिति निर्वाचित भएका छन्। नेपाली कांग्रेस चितवन जिल्लाको इतिहासमा पहिलोपटक ५ जना केन्द्रिय सदस्यहरु निर्वाचित भएका छन्।
लामो समयदेखि चितवन कांग्रेसको विरासत धान्दै आएका पुर्व जिल्ला सभापति टेक प्रसाद गुरुङ, महिला नेत्री द्वय शान्ति परियार र अन्जनी श्रेष्ठ, पुर्व स्वास्थ्य राज्यमन्त्री उमेश श्रेष्ठ र स्पस्ट वक्ता तथा जेसिजका पुर्व केन्द्रिय अध्यक्ष दिनेश कोइराला केन्द्रिय सदस्यमा निर्वाचित हुनुभएको छ।
खुला प्रतिस्पर्धामा १७८१ मत सहित ३१ औं स्थानमा दिनेश कोइराला निर्वाचित हुनुभएको थियो भने उमेश श्रेष्ठ र टेकप्रसाद गुरुङ आदिवासी/जनजाति कोटा अन्तर्गत निर्वाचित हुनुभएको हो। नेत्री अन्जनी श्रेष्ठ आदिवासी/जनजाति महिला कोटामा र शान्ति परियार दलीत कोटा अन्तर्गत निर्वाचित हुनुभएको हो।

यसैगरी चितवन कांग्रेसका जिल्ला सभापति जितनारायण श्रेष्ठ भने जनजाति कोटा अन्तर्गत केन्द्रिय सदस्यमा पराजित हुनुभएको छ। केन्द्रिय स्तरमा प्रभुत्व रहेको चितवन कांग्रेसको इतिहासमा पहिलोपटक ५ जना केन्द्रिय सदस्य निर्वाचित हुनु आफैमा चुनौतीपूर्ण रहेको पनि पाइएको छ। कांग्रेस चितवनका क्रियाशील सदस्यहरु अब विकासका लहरहरु आउने अपेक्षा राखेका छन्। अब यो नेतृत्वले केन्द्रिय स्तरमा कस्तो प्रभाव राख्नेछ भन्ने चैं हेर्न नै बाँकी छ।