शहिद स्मारक ए डिभिजन लिग फुटबलमा आज एक खेल मात्रै हुँदैछ । लिगको सातौं चरण अन्तर्गत विभागीय टोली नेपाल पुलिस क्लब र साविक विजेता मछिन्द्र क्लबबीच आज प्रतिस्पर्धा हुनेछ ।

त्रिपुरेश्वरस्थित दशरथ रंगशालामा साँझ पौने ५ बजे खेल सुरु हुनेछ । उपाधि दाबेदार मानिएको मछिन्द्रका लागि यो खेल महत्वपूर्ण रहेको छ । एएफसी कप छनोट खेल्नका लागि मछिन्द्रलाई पुलिसविरुद्ध जित्नैपर्ने दबाब छ । मछिन्द्र ६ खेलमा १४ अंक जोडेर दोस्रो स्थानमा रहेको छ । एएफसी कप छनोट खेल्न सातौं चरण सकिदा मछिन्द्रलाई शीर्ष स्थानमा उक्लनु पर्नेछ ।

यसकारण मछिन्द्रलाई जित बाहेक अन्य बिकल्प छैन । पुलिससँग हार वा बराबरीमा रोकिएमा मनाङ एएफसी कपका लागि छनोट हुनेछ । मनाङ ७ खेलमा १६ अंक जोडेर शीर्ष स्थानमा रहेको छ ।