मोरङको लेटाङमा ६० वर्षीय वृद्धको हत्या गरेको आरोपमा ८१ वर्षीय वृद्ध पक्राउ परेका छन् ।

जिल्ला प्रहरी कार्यालय मोरङले दिएको जानकारीअनुसार लेटाङ नगरपालिका–२, फँडानीमा घटना भएको हो । पाहुना आएका ६० वर्षीय प्रेमबहादुर बुढाथोकीको हत्या गरेको आरोपमा ८१ वर्षीय डम्बरबहादुर भुजेल पक्राउ परेका हुन् ।

भुजेलको आँगनमा बुढाथोकीको शव भेटिएको र टाउकोमा बन्चरो वा त्यस्तै धारिलो हतियारले प्रहार भएको जस्तो चोट देखिएको प्रहरीले जनाएको छ ।

सोमबार बेलुका बुढाथोकी र भुजेलले सँगै बसेर मदिरा सेवन गरेको स्थानीयले बताएको प्रहरीको भनाइ छ । मदिरा सेवनपछि विवाद भएको हुन सक्ने बताइएको छ ।भुजेललाई इलाका प्रहरी कार्यालय लेटाङको प्रहरी टोलीले पक्राउ गरेको छ ।