पश्चिम चितवन पत्रकार मञ्चको प्रथम पूर्ण बैठक सम्पन्न भएको छ । बैठकले पदाधिकारी सहितको विधान मस्यौदा समिति, सचिवालय र ७ वटा उपसमिति गठन गरेको छ ।
मञ्चको पदाधिकारी अध्यक्ष अपिल घिमिरे, उपाध्यक्ष अनिल भट्टराई, दीपा गौतम, सचिव हेमराज रिमाल, कोषाध्यक्ष रविन सुवेदी, सहसचिव विवेक पोख्रेल र विनिता श्रेष्ठ रहने गरि मस्यौदा समिति बनाएको हो ।
बैठकले सचिवालयको समूहमा भने पदाधिकारी सहित सदस्य सविता अधिकारी र रामशरण गैरेलाई थप गरेको छ ।

मञ्चका सचिव हेमराज रिमालका अनुसार संयोजक र सदस्यहरु सहित ७ उपसमिति समेत निर्माण भएको छ । जसअनुसार विधानमस्यौदा उपसमितिमा संयोजकमा मञ्चका अध्यक्ष अपिल घिमिरे, क्षमता विकास तथा अतिरिक्त क्रियाकलाप उपसमिति संयोजकमा उपाध्यक्ष अनिल भट्टराई, महिला शसक्तिकरण उपसमितिमा महिला उपाध्यक्ष दीपा गौतम, आर्थिक उपसमितिमा संयोजकमा कोषाध्यक्ष रविन सुवेदी, आईटी उपसमितिमा सहसचिव विवेक पोख्रेल, प्रतिवेदन लेखन उपसमिति संयोजकमा सदस्य रामशण गैरे, समन्वय उपसमिति संयोजकमा सदस्य हिरालाल आचार्यलाई चयन गरिएको रिमालले बताए ।

बैठकमा मञ्चका अध्यक्ष घिमिरेले प्रस्ताव गरेको कार्ययोजनामा विधान तयार गरि २० माघभित्र दर्ता प्रकृया सम्पन्न गर्ने बताएको छ । योसँगै पत्रकारको क्षमता विकासको लागि लागि प्रशिक्षण कार्यक्रम गर्ने , कोरोनाका विरुद्ध सचेतना अभियान सञ्चालन गर्ने, अक्षयकोष स्थापना गर्ने, पश्चिम चितवनको जनप्रतिनिधि, पर्यटन समितिलगायतका विभिन्न क्षेत्रमा अन्तक्रिया गर्ने अध्यक्ष घिमिरेले बताए ।

मञ्चले पश्चिम चितवनको पर्यटनमा टेवा पुर्‍याउने अपेक्षा

पश्चिम चितवनको पर्यटनमा मञ्चले टेवा पुर्‍याउनेमा स्थानीय संघसंस्थाहरु आशावादी छन् ।
पश्चिम चितवन पत्रकार मञ्चको बैठक अघि पटिहानीका विभिन संघसंस्थाहरुले संयुक्त रुपमा पत्रकारहरुलाई अतिथ्यता गराउँदै स्वागत तथा अन्तक्रिया कार्यक्रममा यो अपेक्षा व्यक्त गरेका हुन् ।

भरतपुर महानगरपालिका वडा नम्बर २२ का कार्यवाहक अध्यक्ष सोमबहादुर गुरुङले पर्यटन विकासमा वडा कार्यालय सक्रियरुपमा लागेको अवस्थामा पश्चिम चितवन पत्रकार मञ्चले प्रचारप्रसारमार्फत आफूहरुलाई सहयोग गर्ने अपेक्षा व्यक्त गरे ।
यस्तै पटीहानी उपभोक्ता समितिका अध्यक्ष शंकर महत्तोले इतिहासलाई जोडेर यस क्षेत्रको पर्यापर्यटनको विकास गरिदिन पत्रकारहरुसँग अनुरोध गरे । पटिहानी पर्यटन विकास समितिका अध्यक्ष शंकरराज थपलियाले पश्चिम चितवनको पर्यटनमा आशासँगै निराशा पनि रहेको भन्दै निकुञ्ज ऐन पर्यटन मैत्री बनाउन मञ्चमा अवद्ध पत्रकारहरुले आवज उठाउने अपेक्षा व्यक्त गरे ।

भरतपुर महानगरपालिका वडा नम्बर २२ को कार्यालय, पटिहानी मध्यवर्ती उपभोक्ता समिति, पटिहानी पर्यटन विकास समिति, वेलशाहर मध्यवर्ती सामुदायिक वन उपभोक्ता समूह, वीरेन्द्रनगर मध्यवर्ती सामुदायिक वन उपभोक्ता समूह र पटिहानी पर्यटन होटल एसोसिएसनले संयुक्तरुपमा पत्रकारहरुलाई स्वागत गर्दै अन्तक्रिया कार्यक्रम गरेका थिए ।

बैठकसँगै स्थानीय सामुदायिक वन, अम्ब्रेला स्ट्रिट, छितामाईलगायतका ठाउँको अवलोक कार्यक्रम समेत भएको थियो । अध्यक्ष घिमिरेले पत्रकारहरुको पेशागत हकहितसँगै पश्चिम चितवनको विकास निर्माण र पर्यटकीय क्षेत्रको प्रचारमा मञ्चले आफ्नो भूमिका निर्वाह गर्ने बताए ।

समाचार श्रोत : कायकैरन