गत माघ ४ गतेदेखि देशभरका पाँच राष्ट्रिय निकुञ्जमा बाघको गणना जारी छ। पर्सा राष्ट्रिय निकुञ्जमा अहिले फिल्डमा क्यामेरा जडान गरी बाघको गणना गर्ने काम शुरु भइसकेको बताइएको छ।
पछिल्लो १२ दिनमा पर्सा राष्ट्रिय निकुञ्जको सेवा क्षेत्र पर्सा, बारा, मकवानपुरको ६२८ वर्ग किलोमिटर र निकुञ्जले छोएको वरपरका क्षेत्र चितवन राष्ट्रिय निकुञ्जको सीमा, रौतहटको जंगल, डिभिजन बन कार्यालय, पर्सा, बाराका क्षेत्रलगायत ३२१ वटा ठाउँमा ३२१ जोडी क्यामेरा जडान गर्ने काम भइसकेको र बाघ गणनाको काम अगाडि बढिसकेको निकुञ्जका सहायक प्रमुख संरक्षण अधिकृत मनोज भगतले जानकारी दिए।
३२१ जोडी क्यामेरामध्ये राष्ट्रिय निकुञ्ज क्षेत्रभित्रको तीन जोडी र डिभिजन बन कार्यालय पर्साको दुई जोडी गरी पाँच जोडी क्यामरा हराएको उनले बताए। काठ तस्करी तथा वन्यजन्तुको चोरी शिकारी गर्ने उद्देश्यले ती क्यामराहरू चोरी गरेको हुन सक्ने र त्यसबारे सम्बन्धित निकायले अनुसन्धान थालेको उनले बताए।
नेपालमा १२ वटा राष्ट्रिय निकुञ्ज र एउटा आरक्ष रहेकामा अहिले शुक्लाफाँटा, बर्दिया, बाँके, चितवन र पर्सा राष्ट्रिय निकुञ्जमा मात्र बाघ गणना भइरहेको छ। नेपालमा बाघको संख्या बढ्ने वन्यजन्तु संरक्षणविद्हरूले अनुमान गरेका छन्।
पर्सा राष्ट्रिय निकुञ्जमा भइरहेको बाघ गणनाको नतिजा एक महिनापछि आगामी मार्चको पहिलो सातामा आउने भगतले बताए। सन् २०१८ को तथ्याङ्क अनुसार नेपालभरिका राष्ट्रिय निकुञ्जमा २३५ वटा बाघ रहेका छन्।
