पूर्वी नवलपरासीमा एक जना अटो चालकको शंकास्पद मृत्यु भएको छ। ना २ ह ६१७३ नम्बरको अटो चालक कावासोती १३ गैरी नयाँ बस्तीका ५२ वर्षीय माधवप्रसाद गिरीको मृत्यु भएको प्रहरीले जनाएको छ।

मृतकको अनुहारमा चोट लागेको छ। घटना स्थलदेखि केही पर बाटोमा अटो भेटिएको छ। घटनास्थल वरपर सिक्री, २ थान मोबाइल र जुत्ता फेला परेको छ।

गिरीलाई हसैले हत्या गरेको हुन सक्ने प्रहरीले प्रारम्भिक अनुसन्धानबाट अनुमान गरेको छ। जिल्ला प्रहरी कार्यालय नवलपुरका प्रहरी उपरीक्षक प्रज्जवल महर्जनले घटना शंकास्पद भएको र घटनाको अनुसन्धान भइरहेको बताए।

तालिमप्राप्त कुकुरको प्रयोग गरेर अनुसन्धान अगाडि बढाउने प्रहरीले जनाएको छ। गिरीको शव कावासोती १३ बौनाहाको सिलहट घोलमा पानीको दलदलमा गाडेको अवस्थामा आज फेला पारेको थियो।

हिजो राति बेपत्ता भएका गिरीको शव आज बिहान साढे ८ बजेतिर भेटाएपछि प्रहरीलाई खबर गरेको थियो। घटना स्थलमा जिल्ला प्रहरी कार्यालय नवलपुरका प्रहरी उपरीक्षक प्रज्जवल महर्जन सहितको टोली खटेका छन्।