चितवन १९ माघ । भरतपुर महानगरपालिका क्षेत्रमा स्मार्ट सडक बत्तीको जडान कार्य सुरू भएको छ। उज्यालो सहर अभियानअन्तर्गत नेपाल विद्युत प्राधिकरण राष्ट्रिय सडक बत्ती प्रवर्द्वन आयोजना तथा भरतपुर महानगरपालिकाको साझेदारीमा स्मार्ट सडक बत्ती जडान कार्य सुरू गरिएको हो। मंगलबार भरतपुर २५ स्थित शुक्रनगरको साना किसानचोकबाट स्मार्ट सडक बत्तीको निर्माण कार्य औपचारिकरूपमा थालनी गरिएको हो।
यी दुई सरकारी संस्थामार्फत ११ करोड ४९ लाख ८९ हजार ३०० रूपैयाँ लागतमा काम थालिएको मेयर रेनु दाहालले बताइन्। आउँदो वैशाखभित्र काम सकाउने गरी नयाँ कामको थालनी भएको उनको भनाइ छ। उनका अनुसार भरतपुर महानगरपालिकाभित्रका कुल ७८.१ किलोमिटर दुरी सडकमा एक हजार ९३३ थान बत्ती जडान गर्ने योजना रहेको उनले बताइन्।
‘हामीले गएको तिहारमै भरतपुरलाई झिलिमिली सहर बनाउने प्रयास गरेका थियौँ, विविध कारणले त्यतिबेला सम्भव भएन,’ उनले भनिन्, ‘अहिले कामको थालनी भइसकेको हुँदा ढिलोमा वैशाखभित्र काम सक्न निर्माण कम्पनीलाई आग्रह गरेको छु।’ हाललाई सात वटा मार्गलाई प्राथमिकतामा राखिएको उनले बताइन्। तीमध्ये चौबीसकोठी–रामपुर–मेघौली सडकको २३.९ किलोमिटरमा ५६९ वटा बत्ती जडान हुनेछन्।
मंगलपुर–शिवनगर–शुक्रनगर सडक खण्डको २२.१३ किलोमिटर सडकमा ६५२, हाकिमचोक–गीतानगर–जगतपुर बजार सडक खण्डमा १८.४६ किलोमिटर सडकमा ४०१, दियालो बंगला चोक–जिल्ला प्रशासन कार्यालय सडक खण्डको ७.८६ किलोमिटर सडकमा १६५, पुलचोक–पोखरा बसपार्क–दियालो बंगलाचोक सडक खण्डको २.४२ किलोमिटर सडकमा ५८, बसेनी बजार–लामाटोल सडक खण्डको २.१७ किलोमटर सडकमा ५० र क्याम्पस गेट–रमाइलोचोक–विशालचोक सडकको १.२६ किलोमिटर सडकमा ३८ वटा स्मार्ट सडक बत्ती जडान गर्न लागेको हो।
निर्माणको जिम्मा भने सेफ स्टिल/सुर्योदय उर्जा/टपसन जेभीले पाएको छ। बत्ती जडान हुने सडकको पनि मुख्य चोकहरूमा भने हाइस्मार्ट बत्ती जडान हुने महानगरले जनाएको छ। जिल्ला प्रशासन कार्यालय चोक, मालपोत चोक, चौबीसकोठी चोक, वीरेन्द्र क्याम्पस गेट चोक, सहिदचोक, पुलचोक, पोखरा बसपार्क र दियालो बंगला चोकमा हाइस्मार्ट बत्ती जडान हुने मेयर दाहालले बताइन्।
स्मार्ट बत्ती जडानको कार्य सम्पन्न भएपछि भरतपुर महानगरले थप नयाँ स्वरूप पाउने विश्वास लिइएको छ। ‘महानगरपालिकाले लिएको योजनामध्येको एउटा महत्त्वपूर्ण काम स्मार्ट सडक बत्ती पनि हो,’ मेयर दाहालले भनिन्, ‘यसलाई हामीले एक ठाउँमा बसेर बत्तीको अवस्थाबारे जानकारी लिन सक्छौँ।’
