धादिङ र बझाङमा भएका छुट्टाछुट्टै दुर्घटनामा दुई जनाकाे मृत्यु भएकाे छ। एकजना घाइते छन्।
पृथ्वी लोकमार्ग अन्तरगत धादिङको धुनीबेंसी नगरपालिका ९ बिस किलोमा गएराति टिपर दुर्घटना हुँदा चालकको घटनास्थलमै मृत्यु भएको छ।
परिचालक घाइते भएका छन्। मृत्यु हुनेमा धुनीबेंसी ८ भदौरेका ३२ बर्षीय राज कुमार श्रेष्ठ रहेका छन्। काठमाडौंबाट खानीखोला तर्फ जाँदै गरेको बा ४ ख ११६२ नम्बरको टिपर गएराति पौने ३ बजे अनियन्त्रित भई सडकबाट अन्दाजी २० मिटर तल खसेको थियो।
घाइते भएका परिचालक काठमाडौंका २० वर्षीय सविन कुँवरलाई उपचारको लागी राष्ट्रिय ट्रमा सेन्टर काठमाडौं पठाइएको ईलाका प्रहरी कार्यालय खानीखोलाले जनाएको छ।
यस्तै बझाङको थलारा गाँउपालिका ३ चाखुडीधारमा बिहीबार बेलुका ट्याक्टरको चक्काले किचेर परिचालकको घटनास्थलमै मृत्यु भएको छ। मृत्यु हुनेमा थलारा २ का २८ वर्षीय लाल बहादुर दाहाल रहेका छन्।
झनना बजारबाट कफलडाँडा तर्फ आउँदै गरेको सुदुरपश्चिम प्रदेश १–००२ त ५७२७ नम्बरको ट्याक्टर उकालोमा नचढी पछाडी सर्दा ट्याक्टर पछाडी उभिएका दाहाललाई बिहीबार बेलुका सवा ७ बजे किचेको थियो।
ट्याक्टर चालक प्रहरीको सम्पर्कमा रहेको इलाका प्रहरी कार्यालय थलारा बझाङले जानकारी दिएको छ।
