चितवनमा पछिल्लो केहि दिनयता दैनिक थपिने संक्रमितको संख्या घटेको छ भने संक्रमणमुक्त हुनेको संख्या बढ्न थालेको छ । जसका कारण जिल्लामा सक्रिय संक्रमितको संख्या पनि विस्तारै ओरालो लागेको छ ।
स्वास्थ्य कार्यालय चितवनकाअनुसार पछिल्लो २४ घण्टामा ६६ जना संक्रमित थपिए भने ४८८ संक्रमित संक्रमणमुक्त भए । पछिल्लो दुई दिनमा २०१ संक्रमित थपिँदा ८४० संक्रमित संक्रमणमुक्त भएका छन् ।
शनिबार जिल्लामा सक्रिय संक्रमितको संख्या तीन हजार ४४३ मा झरेको छ । जसमध्ये तीन हजार ४०६ संक्रमित होम आइसोलेसनमा छन् भने ३७ संक्रमित अस्पताल आइसोलेसनमा छन् ।
जिल्लामा हालसम्म ३३ हजार १०५ जनामा संक्रमण पुष्टि भएको छ भने २९ हजार २२१ संक्रमित निको भइसकेका छन् । हालसम्म ४४१ संक्रमितको मृत्यु भएको छ ।
