चितवन, मंसिर २९ –

नेपाली कांग्रेसका नेता एवं पूर्वअर्थमन्त्रि डा.रामशरण महतले अबको चुनवापछि नेपालमा कम्युनिष्टहरु देखा नपर्ने बताएका छन् । सोमबार चितवनमा नेपाली कांग्रेसले आयोजना गरेको सरकार विरोधी प्रदर्शनपछिको कोण सभालाई सम्बोधन गर्दै डा. महतले अबको चुनावपछि नेपालमा कम्युनिष्टहरु नरहने दाबी गरेका हुन् ।

कार्यक्रममा बोल्दै उनले विश्वमा कम्युनिष्टहरु पतन भएको उदाहरण प्रस्तुत गर्दै आगामी चुनवादेखि नेपालमा पनि कम्युनिष्टहरु नरहने बताए । ‘साम्यावद भनेको, कम्युनिष्ट भनेको विश्वबाट डेट एक्सापायर भएको पार्टी हो । चीन र उत्तरकोरिया बाहेक अरु देशमा छैनन् । नेपालमा यसले जनतालाई झुक्याएर मत हाँसिल गरेको हो’ उनले भने । नेकपाले नेपालीहरुलाई झुठा आश्वासन दिएर बहुमत प्राप्त गरेको भन्दै अब जनताले कम्युनिष्टलाई विश्वास नगर्ने उनले बताए । सरकार अधिनायकबाद बन्दै गएको बताउँदै उनले कांग्रेसले त्यसलाई कहिल्यै पूरा हुन नदिने जिकिर गरे ।

कांग्रेसले नै विगतमा बहुदलको वकालत गरी यो परिवर्तन ल्याएको भन्दैै उनले कम्युनिष्टहरु एकदलमा विश्वास गर्ने पार्टी भएको बताए । बहुदलको विरोधी ओली सरकार तानाशाही बन्दै गएको उनको भनाइ थियो । तनहुँमा रामचन्द्र पौडेललाई पक्राउ गर्नु पनि यसैको एक उदाहरण भएको उनले बताए । कम्युनिष्टहरु मानव अधिकारलाई ख्याल नगरी अधिनायकवादमा विश्वास राख्ने पार्टी भएको उनको आरोप छ ।

नेकपा र नेकपाको सरकार परिपक्क र दुरदर्शि नभएको बताउँदै उनले यस्तो सरकारबाट विकासको आशा गर्न नसकिने बताए ।देशका राष्ट्रिय गौरवका आयोजना कांग्रेसका पालामा नै सुरु भएको बताउँदै उनले त्यो आयोजनालाई कम्युनिष्टहरुले आफ्नो उपलब्धि भनेर प्रचारप्रसार गरिरहेको बताए । कांग्रेसले आज देशभर सरकार विरोधी प्रदर्शन गरेको छ ।