एजेन्सी – ओपनर जस बटलरको सानदार शतकको सहयोगमा राजस्थान रोयल्स इन्डियन प्रिमियर लिग (आइपिएल) २०२२ को फाइनलमा पुगेको छ । राजस्थानले रोयल च्यालेन्जर्स बेंगलोरलाई ७ विकेटले हराउँदै दोस्रो पटक आइपिएलको फाइनलमा पुगेको छ । राजस्थान सन् २००८ पछि फाइनलमा पुगेको हो ।
जितको लागि १ सय ५८ रनको मध्यम विजयी लक्ष्य पछ्याएको राजस्थानले १८.१ ओभरमा ३ विकेट गुमाउँदै पूरा गर्यो । राजस्थानको जितमा जस बटलर ६० बलमा १० चौका र ६ छक्कासहित सर्वाधिक १ सय ६ रनमा अविजित रहे । बटलरको जारी सिजनमा चौथो शतक हो ।
बटलरले २०१६ मा बेंगलोरका विराट कोहलीले प्रहार गरेको एकै सिजनमा सर्वाधिक ४ शतकको कीर्तिमान बराबर गरेका छन् । बटलरले हर्षल पटेललाई छक्का प्रहार गर्दै खेल सकाए ।
राजस्थानलाई ओपनर यशश्स्वी जैसवाल र जस बटलरले ५.१ ओभरमा ६१ रनको साझेदारी गर्दै उत्कृष्ट सुरुवात दिलाए । जैसवाल जोश हेजलवुडको बलमा प्वाइन्टमा विराट कोहलीबाट २१ रनमा आउट भए । १३ बल खेलेका जैसवालले १ चौका र २ छक्का प्रहार गरे ।
कप्तान सञ्जु स्यामसन २१ बलमा १ चौका र २ छक्कासहित २३ रनमा स्टम्पिङ आउट भए । बेंगलोरका जोश हेजलवुडले २ र वानिन्दु हसरंगाले १ विकेट लिए ।
त्यसअघि नरेन्द्र मोदी स्टेडियम अहमदाबादमा टस हारेर ब्याटिङको निम्तो पाएको बेंगलोरले निर्धारित २० ओभरमा ८ विकेट गुमाउँदै १ सय ५७ रन बनाएको थियो । बेंगलोरका रजत पाटिदारले ४२ बलमा ४ चौका र ३ छक्कासहित सर्वाधिक ५८ रन बनाए ।
पाटिदारले प्रसिद्ध कृष्णको छैटौं ओभरको पाँचौं बलमा रियान परागले ब्यक्तिगत १४ रनमा क्याच छाड्दा जीवनदान पाएका थिए । प्रमुख ब्याटर विराट कोहली, ग्लेन म्याक्सेवल र फाफ डु प्लेसिस महत्वपूर्ण खेलमा पुन सस्तैमा आउट भए । तीव्र गतिका बलर प्रसिद्ध कृष्णको दोस्रो ओभरको पाँचौं बलमा आउटसाइड एज लागेर विकेटकिपर सञ्जु स्यामसनबाट ७ रनमा समातिए ।
विराट सस्तैमा आउट भएपनि दोस्रो विकेटका लागि पाटिदार र फाफ डु प्लेसिसले ७० रनको साझेदारी गर्दै बेंगलोरलाई अघि बढाए । डु प्लेसिस ओबेद म्याकोयको बलमा आश्विनबाट २५ रनमा क्याच भए । बेंगलोरका आक्रामक ब्याटर ग्लेन म्याक्सवेल १३ बलमा १ चौका र २ छक्कासहित २३ रनमा क्याच आउट भए । बोल्टको १४ औं ओभरको अन्तिम बलमा फाइन लेगमा छक्का हार्न खोजेपनि म्याकोयबाट क्याच भए ।
पाटिदार आश्विनको १६ औं ओभरको तेस्रो बलमा लगातार दुई छक्का हान्ने धुनमा जस बटलरबाट क्याच हुन पुगे । पाटिदार आउट भएपछि बेंगलोरले रनको गति बढाउन सकेन । दीनेश कार्तिक ६, महिपाल लोमरोर ८, हर्षल पटेल १, वानिन्दु हसरंगा गोल्डेन डक आउट भए । शहबाज अहमद १२ रनमा अविजित रहे ।
राजस्थानका तीव्र गतिका बलर प्रसिद्ध कृष्णले ४ ओभरमा २२ रन खर्चेर ३ विकेट लिए । बायाँ हाते तीव्र गतिका बलर ओबेद म्याकोयरले ४ ओभरमा २३ रन खर्चेर २ विकेट लिए । ट्रेन्ट बोल्ट र रविचन्द्रन आश्विनको नाममा १–१ विकेट रह्यो ।
राजस्थानले फाइनलमा गुजरात टाइटन्ससँग आइतबार प्रतिस्पर्धा गर्नेछ । पहिलो क्वालिफायरमा राजस्थानलाई ७ विकेटले हराउँदै गुजरात फाइनलमा पुगि सकेको छ । राजस्थान दोस्रो पटक उपाधि जित्ने सोचमा हुँदा गुजरात आफ्नो पहिलो सिजनमै च्याम्पियन बन्ने दाउँमा छ ।
