काठमाडौं । नेपाली कांग्रेसको केन्द्रीय सदस्य पदका लागि गण्डकी प्रदेशबाट विष्णु पौडेल ‘दारी’ले उम्मेदवारी घोषणा गरेका छन्। विद्यार्थी राजनीतिबाट राजनीतिक यात्रा सुरु गरेका पौडेल लामो समयदेखि नेपाली कांग्रेसको संगठनमा सक्रिय रहँदै आएका छन्। युवामाझ लोकप्रिय नेताका रूपमा समेत परिचित पौडेलले यसपटक पार्टीको केन्द्रीय नेतृत्वमा आफ्नो दाबी प्रस्तुत गरेका हुन्। पौडेलले त्रि–चन्द्र क्याम्पसमा नेपाल विद्यार्थी संघ (नेविसंघ)को उपसभापतिको जिम्मेवारी सम्हाल्दै विद्यार्थी राजनीतिमा सक्रिय भूमिका निर्वाह गरेका थिए। त्यसपछि त्रि–चन्द्र नेविसंघ इकाइ सभापतिको जिम्मेवारीसमेत सम्हालेका उनले विद्यार्थी संगठनलाई बलियो बनाउने तथा युवाका मुद्दालाई राजनीतिक बहसमा स्थापित गर्ने काममा सक्रियता देखाएका थिए।
२०६२/६३ को ऐतिहासिक जनआन्दोलनमा समेत पौडेल सक्रिय रूपमा सहभागी भएका थिए। लोकतन्त्र र राजनीतिक परिवर्तनका लागि भएको आन्दोलनमा विद्यार्थी तथा युवाको तर्फबाट सक्रिय भूमिका निर्वाह गरेको उनको राजनीतिक यात्राको महत्वपूर्ण पाटोका रूपमा लिइन्छ। विद्यार्थी राजनीतिबाट स्थापित हुँदै आएका पौडेलले नेपाली कांग्रेसको भ्रातृ संगठन नेपाल तरुण दलको केन्द्रीय सदस्यको जिम्मेवारीसमेत सम्हालिसकेका छन्। विद्यार्थी संगठनदेखि तरुण दल हुँदै पार्टीको मूल संगठनमा निरन्तर सक्रिय रहँदै आएका कारण युवापंक्तिमा उनको राजनीतिक परिचय र प्रभाव बलियो रहेको कांग्रेस कार्यकर्ताहरू बताउँछन्। पौडेलका अनुसार उनी विगत २२ वर्षदेखि निरन्तर नेविसंघमार्फत नेपाली कांग्रेसको संगठनसँग जोडिँदै आएका छन्। विद्यार्थी राजनीति, सामाजिक अभियान, संगठन निर्माण तथा पार्टीका विभिन्न गतिविधिमा निरन्तर सक्रिय रहँदै आएका उनले यसअघि नेपाली कांग्रेसको महाधिवेशन प्रतिनिधिको जिम्मेवारीसमेत निर्वाह गरिसकेका छन्।
राजनीतिसँगै पौडेलको शैक्षिक पृष्ठभूमिसमेत विविध र उच्च छ। उनले बीएस्सी अध्ययन गरेका छन् भने ग्रामीण विकासमा स्नातकोत्तर, मानवशास्त्रमा स्नातकोत्तर तथा राजनीतिशास्त्रमा स्नातकोत्तर उपाधि हासिल गरेका छन्। मानवशास्त्रमा एमफिलसमेत गरेका पौडेलले राजनीतिक अनुभवसँगै अध्ययन र अनुसन्धानलाई पनि आफ्नो व्यक्तित्वको महत्वपूर्ण आधार बनाउँदै आएका छन्। लामो संगठनात्मक अनुभव, विद्यार्थी तथा युवा राजनीतिमा सक्रियता र पार्टीभित्रको निरन्तर संलग्नतालाई आधार बनाउँदै पौडेलले यसपटक नेपाली कांग्रेसको गण्डकी प्रदेशतर्फ खुला केन्द्रीय सदस्य पदमा उम्मेदवारी दिएका हुन्।
उनको उम्मेदवारीसँगै विद्यार्थी राजनीतिबाट पार्टीको केन्द्रीय नेतृत्वमा पुग्न खोजिरहेका युवा नेताहरूबीच समेत चासो बढेको छ। पौडेलले आफ्नो उम्मेदवारीलाई विगतमा संगठनमा गरेको योगदान र अनुभवलाई पार्टीको केन्द्रीय तहमा थप प्रभावकारी रूपमा उपयोग गर्ने अवसरका रूपमा प्रस्तुत गरेका छन्। पौडेलले नेपाली कांग्रेसलाई थप सुदृढ, व्यवस्थित, गतिशील र संगठनमुखी बनाउन आफूले भूमिका खेल्ने बताएका छन्। विशेषगरी युवालाई पार्टीको नेतृत्व र निर्णय प्रक्रियामा थप प्रभावकारी रूपमा जोड्नुपर्ने उनको धारणा छ। केन्द्रीय सदस्य पदका उम्मेदवार पौडेलले गण्डकी प्रदेशबाट प्रतिनिधित्व गर्ने नेपाली कांग्रेसका सम्पूर्ण महाधिवेशन प्रतिनिधिहरूलाई आफ्नो उम्मेदवारीबारे जानकारी गराउँदै सहयोग, समर्थन र मतका लागि आग्रह गरेका छन्। विद्यार्थी आन्दोलनबाट सुरु भएको राजनीतिक यात्रा, २०६२/६३ को जनआन्दोलनमा सक्रिय सहभागिता, त्रि–चन्द्र नेविसंघ नेतृत्व, तरुण दल केन्द्रीय सदस्य हुँदै कांग्रेसको केन्द्रीय नेतृत्वमा पुग्ने आकांक्षासहित पौडेलले यसपटक गण्डकीबाट आफ्नो दाबी प्रस्तुत गरेका हुन्।
