पोर्चुगलका विश्व चर्चित स्टार क्रिस्टियानो रोनाल्डो अन्तत: साउदी क्लब अल नसिरमा आवद्ध भएका छन्। उनले विश्व कीर्तिमानी मूल्यमा साउदी क्लबसँग २०२५ सम्मको सम्झौता गरेका छन्।
क्लबबाट रोनाल्डोले वार्षिक १७७ मिलियन पाउन्ड बढी पारिश्रमिक लिइने जनाइएको छ।
पोर्चुगिज कप्तान रोनाल्डोले म्यानचेस्टर युनाइटेड छोडेपछि फ्री एजेन्ट बनेका थिए। उनले क्लब र प्रशिक्षकका विषयमा एक अन्तरवार्ता दिएसँगै युनाइटेड त्याग्नु परेको थियो।
३७ वर्षीय रोनाल्डोले भने, ‘नयाँ अनुभवका लागि फरक देशको फरक क्लबको अनुभव बटुल्नका लागि उत्साही छु।’
‘म भाग्यमानी रहेँ, मैले सबै थोक जितेको छु। मैले युरोपियन फुटबलमा जित्न बाँकी केही छैन। त्यसैले मेरो अनुभव एसियामा सेयर गर्नका लागि यो राम्रो अवसर हो’, उनले थपे।
रोनाल्डोलाई अनुबन्धन गर्दे क्लबले लिगका लागि रोनाल्डोको आगमन प्रेरणादायी हुने बताएको छ।
उसले भनेको छ, ‘लिगका लागि रोनाल्डोको आगमन प्रेरणादायी हुनेछ। साथै आगामी पुस्ताका लागि समेत रोनाल्डोको आगमनले उत्साह थप्नेछ।’
रोनाल्डोको क्लब यात्रा
यसअघि रोनाल्डो पहिलो पटक १२ अगस्ट २००३ मा १२.२४ मिलियन पाउन्डमा म्यानचेस्टर युनाइटेडमा आवद्व भएका थिए।
त्यस्तै उनी ६ जुलाई २००९ मा ८० मिलियन पाउन्डमा रियल म्याड्रिड पुगुेका थिए भने १० जुलाई २०१८ मा ९९.२ मिलियन पाउन्डमा युभेन्टस गएका थिए।
पछिल्लो पटक ३१ अगस्ट २०२१ मा उनी १२.८ मिलियन पाउन्डमा म्यानचेस्टर युनाइटेडमा फर्किएका थिए।
