काठमाडौँ, २८ असोज । माल्दिभ्समा जारी साफ च्याम्पियनसिप फुटबलको फाइनलमा नेपाल र भारत प्रतिस्पर्धा गर्ने भएका छन् । गएराती भएको खेलमा आयोजक माल्दिभ्सलाई ३–१ गोल अन्तरले पराजित गर्दै भारतले नेपालसँगको भेट पक्का गरेको हो । फाइनल खेल आगामी आइतबार नेपाली समय अनुसार अपरान्ह् पौने ५ बजे हुनेछ ।
त्यसअघि नेपालले लिग चरणको अन्तिम खेलमा बंगलादेशसँग १–१ को बराबरी खेल्दै नेपाल फाइनलमा स्थान पक्का गरेको थियो । नेपाल पहिलो पटक फाइनलमा पुगेको हो भने भारत सात पटकको विजेता हो ।
सन् १९९३ देखि सुरु भएको साफ च्याम्पियनसिपमा नेपाल १३ औं संस्करणमा आइपुग्दा पहिलो पटक फाइनलमा पुगेको छ ।
खेलको शुरुवातमै बंगलादेशले सुमन रेजाको गोलमा अग्रता लिएको थियो । अन्जन विष्टले ८६ औं मिनेटमा पेनाल्टीमा गोल गर्दै नेपालको फाइनल यात्रा पक्का गरेका थिए । पहिलो पटक फाइनल पुगेको नेपालले चार खेलमा ७ अङ्क जोडेको छ । भारतको भने ८ अङ्क छ ।
यसअघि नेपाल साफ च्याम्पियनसिपको ५ पटक सेमिफाइनल पुगिसकेको टोली हो । पछिल्लो पटक नेपाल सन् २०१८ मा माल्दिभ्ससँग ३–० ले पराजित हुँदै सेमिफाइनलबाटै बाहिरिएको थियो । त्यसअघि सन् २०१३ र २०११ मा अफगानिस्तानले नेपाललाई सेमिफाइनलमा हराएको थियो । सन् १९९५ मा श्रीलंकासँग हारेको नेपाल सन् १९९९ मा भने बंगलादेशसँग पराजित भएको थियो ।
