पूर्वी चितवनको राप्ती नगरपालिका-१२ मा चेपाङ समुदायबाट वडाध्यक्षमा अर्जुन चेपाङ्ग विजयी भएका छन् । निवर्तमान वडाध्यक्षसमेत रहेका ३२ वर्षीय चेपाङ्ग कांग्रेसबाट विजयी भएका हुन् । स्वतन्त्र उम्मेदवार हरिबहादुर तामाङलाई पराजित गर्दै चेपाङ्ग विजयी भएका हुन् ।

उनले ५७१ मत ल्याउँदा स्वतन्त्र उम्मेदवार तामाङले ३८४ मत ल्याएका थिए । तेस्रो स्थानमा एमालेका धर्मजित तामाङले १७३ मत पाए । २०७४ को चुनावमा भन्दा यसपटक उनले मत पनि बढाएका छन् । अघिल्लो पटक ३२० मत ल्याएका उनले यसपटक ५७१ मत पाए । त्यो बेला एमालेलाई उनले ११ मतले पराजित गरेका थिए । ‘अघिल्लोपटक गाह्रो थियो । यसपटक जित्छु भन्ने सुनिश्चत थियो । पाँच वर्षमा जनताको भरोसा पाएको थिएँ । जनतालाई दु:ख पर्दा घरघरमा गएर काम गरेको थिएँ,’ चेपाङ्ग भन्छन् ।

वडालाई ‘नमुना वडा’ बनाउने योजना रहेको उनले सुनाए । ‘डेढ दुई घण्टा हिँडेर विद्यार्थी विद्यालय आउनुपर्ने बाध्यता छ । विद्यालयमा छात्रवास बनाउने योजना छ,’ उनले भने, ‘गुणस्तरीय शिक्षालाई प्राथमिकता दिएको छु । एक घर एक शिक्षित व्यक्ति, एक घर एक रोजगारी बनाउने लक्ष्य छ ।’

अबको पाँच वर्षमा सडकको स्तरोन्नति, कृषिमा व्यवसायीकरण, पशुपालनमा अनुदान, निःशुल्क स्वास्थ्य बीमा र वडालाई पर्यटकीय नगरी बनाउने प्रतिबद्धता उनले गरेका छन् । ‘पर्यटकीय क्षेत्रमा विकास गर्दा मान्छेको आवतजावत हुन्छ । बाहिरका मान्छेसँग यहाँको मान्छेको घुलमिल हुन्छ,’ उनले भने । सिस्नुको पाउडर, बेसार, अदुवा र टिमुरको पनि बजार बिस्तार गरेर जनताको जीवनस्तर उकास्ने उनी बताउँछन् ।