सोलुखुम्बुको सोलुदुधकुण्ड नगरपालिकाका मेयरका लागि नेकपा एमालेबाट आङकाजी शेर्पा उम्मेद्वार बनेका छन् । यस्तै उपमेयरका लागि मनकुमारी बस्नेतको उम्मेद्वारी पक्का भएकी छिन् ।
आज नेकपा एमाले प्रदेश कमिटिले निर्णय गर्दै उक्त नगरपालिकाको मेयर पदका लागि आङकाजी शेर्पालाई उम्मेद्वार बनाउने् सर्वसम्मत निर्णय गरेको नेकपा एमाले सोलुखुम्बुका अध्यक्ष डुफकुमार बास्तोलाले जानकारी दिए । यस्तै उपमेयरका लागि मोहनकुमारी कार्कीको नाम सर्वसम्मत निर्णय गरिएको छ । उपमेयरमा दोहोरिन चाहेकी कल्पना राईले टिकट नपाएपछि अकस्मात पार्टीबाट राजिनामा गरेकी छिन् ।
यस्तै माप्य दुधकोशी गाउँपालिकामा पुरानै अनुहारलाई नेकपा एमालेले दोहोर्याएको छ । अध्यक्षमा बुद्धिकिरण राई र उपाध्यक्ष उम्मेद्वारमा जुनिता मायाँ मगर दोहोरिने भएकी हुन् । यस अघि एमालेबाट यी दुवै उमेदवारले जीत हाँसिल गरी गाउँपालिका चलाएका थिए ।
जिल्लाको हिमाली भेग समेटिएको खुम्बु पासाङल्हमु गाउँपालिकामा अध्यक्षका लागि मिङमाछिरी शेर्पाले अध्यक्षका लागि टिकट पाएका छन् । उनी यस अघि गाउँपालिकाको ३ नम्बर वडा अध्यक्ष थिए । यस्तै उपाध्यक्षमा टासील्हमु शेर्पाले टिकट पाएकी छिन् । हाल गाउँपालिकाको कार्याबाहक अध्यक्षको जिम्मेवारी सम्हाली रहेकी शेर्पाले पुन उपाध्यक्षका लागि टिकट पाएकी हुन् ।
यस्तै नेचासल्यान गाउँपालिकामा अध्यक्षमा डुफकुमार बास्तोला नै दोहोरिने गरी उम्मेद्वार चयन गरिएको छ । उपाध्यक्षमा श्रृजना राईलाई उमेदवार बनाइने निर्णय भएको छ । डुफकुमार बास्तोला निर्वाचित गाउँपालिका अध्यक्षसमेत हुन् ।
यस्तै थुलुङदुधकोशी गाउँपालिकामा आङबाबु राई अध्यक्ष र कल्पना गिरी बस्नेत उपाध्यक्षमा उठ्ने गरी निर्णय भएको एमाले प्रदेश कमिटि सदस्य महेश किराँतीले जानकारी दिए । सोताङ गाउँपालिका अध्यक्षमा प्रकाश कार्कीलाई अध्यक्ष तथा श्रृजना राईलाई उपाध्यक्षमा उम्मेद्वार बनाइएको छ ।
एमालेले महाकुलुङ गाउँपालिकामा भने अध्यक्षमा भक्त राई र उपाध्यक्षमा शुभधनी कुलुङ उमेदवार हुने भएकी छिन् । यता लिखुपिके गाउँपालिका अध्यक्षका लागि एमालेले पोष्टकुमार कार्की र उपाध्यक्षमा सुष्म माया शेर्पालाई उम्मेद्वार बनाइएको छ ।
भोली आइतबारबाट मनोनय दर्ता समेत सुरु हुने भएकाले एमालेले सोलुखुम्बुका आठ ओटै स्थानीय तहमा उम्मेद्वार तय गरेको हो । मिडिया तथा दर्जनौं व्यवसाय गर्ने शेर्पाले केहि दिन अघि मात्र कांग्रेस परित्याग गरि एमाले प्रवेश गरेका हुन्। शेर्पा नेपाली कांग्रेसबाट पछिल्लो महाधिवेशनमा प्रतिनिधि समेत रहेका थिए।
