उद्योग वाणिज्य संघ–चितवनले चितवन प्रहरी प्रमुख नवराज अधिकारीको स्वागत गरेको छ । आज संघको सचिवालयमा चितवन जिल्लाका नयाँ प्रहरी प्रमुख प्रहरी उपरीक्षक अधिकारीलाई संघले स्वागत गरेको हो ।

स्वागत कार्यक्रममा संघका अध्यक्ष चुननारायण श्रेष्ठले विगत लामो समयदेखि उद्यमी व्यवसायी र प्रहरी प्रशासनबीचको सम्बन्ध सुमधुर रहँदै आएको बताए । उनले आगामी दिनमा पनि सम्बन्ध अझ बढी प्रगाढ रहने विश्वास व्यक्त गरे । कार्यक्रममा स्वागत गर्दै अध्यक्ष श्रेष्ठले चितवनको समग्र विकासलगायत यस जिल्लाको शान्ति सुरक्षाको सवालमा समेत प्रहरीसँग हातेमालो गर्दै अगाडि बढ्ने प्रतिबद्धता व्यक्त गरे । उनले भने, ‘संघले विकासको सार्वजनिक निजी साझेदारी अवधारणा बमोजिम स्थानीय प्रशासन, सुरक्षानिकाय, स्थानीय निकायसँग सहकार्य गर्दै अगाडि बढ्ने बताए । सोही कार्यक्रममा जिल्ला प्रहरी कार्यालयका प्रमुख प्रहरी उपरिक्षक नवराज अधिकारीले चितवनको शान्ति, सुरक्षा र अमनचयनमा कुनै कसुर नराख्ने बताउँदै व्यवसायीको तर्फबाट पनि सहकार्यको अपेक्षा राखेको विचार राखे । उनले आमनागरिकले पनि आफू प्रहरी रहेको अनुभूत गर्दै आफ्नो प्रहरी आफूनै बनी व्यवसाय एवम् आफ्नो सुरक्षामा सचेत रहन अनुरोध गरे । सोही कार्यक्रममा उद्योग वाणिज्य संघ चितवनका निवर्तमान अध्यक्ष राजु श्रेष्ठले चितवन जिल्लाको सुरक्षा व्यवस्थापन होस् वा अपराध न्यूनीकरणका सवालमा होस् उद्योग वाणिज्य संघ चितवनले विगतमा पनि सहकार्य गरेको र आगामी दिनमा समेत सहकार्य गर्ने बताए ।

सोही कार्यक्रममा संघका पूर्वअध्यक्ष एवम् नेपाल उद्योग संघका केन्द्रीय अध्यक्ष डा. तिलचन्द्र भट्टराईले चितवन जिल्लामा आर्थिक गतिविधिलाई चलायमान गराउनको लागि व्यस्थित एवम् मर्यादित रात्रिकालिन व्यवसाय सञ्चालन गर्ने आवश्यकता रहेको बताए । कार्यक्रममा संघका पदाधिकारी , कार्यसमिति सदस्य विभिन्न वस्तुगत संघका अध्यक्ष एवम् पदाधिकारीलगायत १०० जनाको उपस्थिति रहेको संघका कार्यकारी निर्देशक निलबहादुर केसीले नारायणी अनलाइनलाई जानकारी दिए । त्यसैगरी सोही कार्यक्रममा संघका अध्यक्ष श्रेष्ठले संघका पूर्वअध्यक्ष एवम् नेपाल उद्योग संघका नवनिर्वाचित अध्यक्ष डा. तिलचन्द्र भट्टराईलाई दोसल्ला ओढाई बधाइ ज्ञापन गरेका थिए । यो समाचारको श्रोत नारायणी अनलाइन हो।