नेपाली कांग्रेस चितवनले भरतपुर महानगरपालिकाको मेयर लिएर अन्य दलसंग गठबन्धन गर्ने निर्णय गरेको छ । आज आइतबार पार्टी कार्यालय कमलनगरमा बसेको जिल्ला कार्यसमितिको बैठकले उक्त निर्णय गरेको हो ।
कांग्रेस केन्द्रको सर्कुलेसनको आधारमा अन्य दलसंग गठबन्धन गर्ने तर भरतपुर महानगरपालिकाको मेयर कांग्रेसले नछोड्ने निर्णय गरिएको जिल्ला सचिव सुर्य अर्यालले चित्रवन खबरलाई जानकारी दिएका छन् ।
‘भरतपुर महानगरपालिकाको हकमा यसपटक प्रमुखमा नेपाली कांग्रेसको उम्मेद्वार रहने गरि तालमेल प्रक्रियालाई अघि बढाउने, यदि त्यो अवस्था रहेन भने एकल रुपमा कांग्रेस चितवन अघि बढ्ने निर्णय भएको छ।”-अर्याल बताउँछन्। उनले प्रमुखमा कांग्रेसले उम्मेद्वारी दिएर उपप्रमुख र अन्य सदस्यहरुमा तालमेल गर्न सकिने बताए । जिल्लामा रहेका ७ वटा पालिकाहरुमा छुट्टाछुट्टै संयन्त्र निर्माण गरि तालमेल प्रक्रियालाई अघि बढाइने उनले जानकारी दिए ।
उनले तालमेलका लागि १० वटा सूचकहरुको आधारमा छलफल गर्दा यसपटक कांग्रेसकै उम्मेद्वार हुनुपर्ने सुझावहरु आएकाले कांग्रेसले महानगर नछोड्ने निश्कर्षमा पुगेको बताए । सचिव अर्यालले उम्मेद्वार छनोटको प्रक्रिया भोलिबाट नै चितवनका सबै पालिकाहरुमा सुरु हुने बताएका छन् ।
पालिकाहरुले सिफारिस गरेका उम्मेद्वारहरुको नामलाई जिल्ला शाखाले आफ्नो दृष्टिकोण र सुझावसहित केन्द्रमा सिफारिस गर्ने उनले बताए । सोही आधारमा केन्द्रले निर्णय गरेका उम्मेद्वारहरुलाई जिताउन कांग्रेस चितवन लागि पर्ने अर्याल बताउँछन्।
