काठमाडौँ : कोरोना भाइरसको सङ्क्रमण एक हप्तादेखि उकालो लागेको छ । गत असार २६ गते पहिलो पटक १०० भन्दा बढी रहेको सङ्क्रमितको सङ्ख्या साेमबारसम्म आइपुग्दा सङ्क्रमण ४५७ पुगेको छ ।
असार २६ गते १२१ मा सङ्क्रमण र ६७८ सक्रिय सङ्क्रमित रहेकोमा साेमबार सक्रिय सङ्क्रमित एक हजार ७७६ पुगेका छन् । आइतबार साउन १ गते र आज सङ्क्रमणका कारणले एक/एक सङ्क्रमितको ज्यान गएको छ । सङ्क्रमण असारदेखि उकालो लाग्न थालेको हो ।
असार २७ गते १६८, असार २८ गते १७७, असार २९ गते २०६ असार ३० गते २६०, असार ३१ गते २२९, असार ३२ गते २०५ र साउन १ गते १३५ मा सङ्क्रमण देखिएको छ । शून्य दशमलव पाँच प्रतिशतमा रहेको सङ्क्रमण अहिले ९.८२ प्रतिशत पुगेको छ । पाँच सयभन्दा बढी सङ्क्रमित काठमाडौँ जिल्लामा रहेका छन् । शून्य सङ्क्रमित हुने जिल्ला पनि घटेर आठ मात्र पुगेको छ ।
इपिडिमियोलोजी तथा सरुवा रोग नियन्त्रण महाशाखाका निर्देशक डा चुमनलाल दास भारतमा सङ्क्रमण बढेसँगै नेपालमा पनि सङ्क्रमण बढेको बताउँछन् । ‘भारतमा दैनिक सङ्क्रमण बढिरहेको छ । भारतबाट हजारौँ मानिस नेपालको सीमा हुँदै प्रवेश पनि गरिरहेका छन्,’ उनले भने, ‘ती सीमा नाकाबाट प्रदेश गर्नेमा दैनिक सङ्क्रमण देखिएको छ । ती मानिसले नै सङ्क्रमण सारिरहेका छन् ।’
उनका अनुसार भारतमा सङ्क्रमण बढ्नुका साथै नेपालमा जनस्वास्थ्यका मापदण्ड लागू नगर्नाले सङ्क्रमण बढेको हो । सङ्क्रमण बढेसँगै कोरोना सङ्क्रमणको चौथो लहर शुरु भएको अनुमान उनकाे छ । ‘नेपालमा कोरोना सङ्क्रमणको चौथो लहरको सङ्केत देखिएको छ,’ उनले भने, ‘संक्रमण दर बढेको छ, यो चौथो लहरको पूर्व संकेत चाहिँ हो तर चौथो लहर होइन ।’
मापदण्ड पालन गर्न आग्रह
कोरोना बढ्दै गएकाले स्वास्थ्यका मापदण्ड पालन गर्न भीडभाडमा नजाने, मास्कको प्रयोग गर्ने चिकित्सकको सुझाव छ । विश्वमा ओमिक्रोनको उपप्रजाती बिए वान र बिए टुलाई बिए फाइभले प्रतिस्थपादन गर्दै गएको छ ।
विभिन्न अध्ययनहरुले बिए फाइभ भेरिएन्ट ओमिक्रोनका अन्य प्रजातिभन्दा बढी सङ्क्रमक भएकाले जनस्वास्थ्यको मापदण्ड अपनाउन स्वास्थ्य तथा जनसङ्ख्या मन्त्रालयका सहप्रवक्ता डा. समिर अधिकारीको आग्रह छ ।
उनकाअनुसार ज्वरो आए पनि नआए पनि यदि घाँटी दुखेको छ, खोकी लागेको छ, थकान महसुस भएमा कोभिड हुन सक्ने भएकाले कोभिडको जाँच गराउनुपर्छ । कोभिडको पिसिआर जाँच सरकारी स्वास्थ्य संस्थामा निःशुल्क गर्दै आएको छ ।