स्वास्थ्य सेवा विभागले औषधि उपकरण खरिदमा अनियमितता नभएको दाबी गरेको छ । विभागले विज्ञप्ति निकालेर १० अर्बको नभइ २ अर्ब ४५ करोड अनुमानित लागतको खरिद प्रक्रिया सुरु गरी करिब १ अर्ब ९३ करोडको खरिद सम्झौता भएको जनाएको हो ।

स्वास्थ्य तथा जनसंख्या राज्यमन्त्री हिराचन्द्र केसीले स्वास्थ्य सेवा विभाग व्यवस्थापन महाशाखाअन्तर्गत आपूर्ति शाखा प्रमुख डा. सुरेन्द्र चौरासियाले आर्थिक अनियमितता गरेको आरोपमा जवाफ दिन मन्त्रालय बोलाएका थिए ।

मन्त्रालय बोलाएको तीन दिनपछि विभागले भनेको छ, ‘आ.व. २०७८/७९ मा समाचारहरूमा उल्लेख गरेअनुसार १० अर्बको नभइ २ अर्ब ४५ करोड अनुमानित लागतको खरिद प्रक्रिया सुरु गरी करीब १ अर्ब ९३ करोडको खरिद सम्झौता भएको छ ।’