पठाओ राइडरहरुलाई लोगो अंकित कपडा नलगाउन ट्राफिक प्रहरीको अनुरोध गरेको छ । विकृति रोक्न राइड सेयरिङ कम्पनी पठाओसँगको सहमतिमै पठाओ भनेर चिनिने प्रोटेक्टिभ गेयर लगाउन रोक लगाइएको महानगरीय ट्राफिक प्रहरी महाशाखाले जनाएको छ ।
राइडरहरुले धेरै अफलाइन ट्रिप गर्ने गरेको र ज्याकेटकै कारण असुरक्षाका घटनाहरु धेरै भएपछि बुधबारबाट लागु हुने गरी यस्तो निर्णय भएको ट्राफिक प्रहरी प्रवक्ता श्यामकृष्ण अधिकारीले जानकरी दिए । ‘अब बुधबारदेखि पठाओ राइडरले पठाओ भनेर चिनिने लोगो अंकित कपडा अर्थात् प्रोटेक्टिभ गेयर लगाउन पाउने छैनन्, लगाए कारबाही हुन्छ,’ प्रवक्ता अधिकारीले भने । पठाओ सञ्चालनमा रोक लगाउने विषय भने सत्य नभएको उनको भनाइ छ ।
हिजो गोंगबुमा आफ्नो यात्रुलाई पठाओ राइडरले लगेको भनेर ट्याक्सी चालकहरुले राइडरहरुलाई निर्घात हुनेगरी पिटेका थिए। सम्पूर्ण राइडरहरुको ज्यानको सुरक्षाको माग गर्दै आज पठाओ अफिस मध्य बानेश्वरमा जम्मा भएका थिए।
तस्बिर सौजन्य: पठाओ राइडर्स नेपाल फेसबुक ग्रुप
