चितवन। स्वास्थ्य तथा जनसंख्या मन्त्री भवानीप्रसाद खापुङले सरकारले खरिद गर्ने प्रक्रियामा रहेको पेट स्क्यान मेसिन धेरै जनताले सेवा पाउने ठाउँमा राख्ने र यो छिटै आउने बताएका छन्।
वीपी कोइराला मेमोरियल क्यान्सर अस्पताल भरतपुरको २३ औं वार्षिकोत्सव तथा १८ औं क्यान्सर सतर्कता दिवसलाई आज सम्बोधन गर्दै उनले क्यान्सर उपचारमा महत्वपूर्ण यो मेसिनबाट धेरैभन्दा धेरै जताले लाभ लिन सक्न गरी राख्ने योजना रहेको बताएका हुन्।
मन्त्री खापुङले भने “सबैभन्दा धेरै जनताले सेवा पाउने अस्पतालमा पेट स्क्यान मेसिन राख्ने हो।” यो क्यान्सर अस्पताल देशकै महत्वपूर्ण भएको भन्दै यसको विकासका लागि आफ्नो तर्फबाट सक्दो सहयोग गर्ने प्रतिबद्धता जनाए।
उहाँले सरकार आधारभूत स्वास्थ्य कसरी निःशुल्क दिन सकिन्छ भनेर लागिरहेको बताउनुभयो। स्वास्थ्य चौकी र पालिकास्तरका अस्पतालहरुमा आधारभूत स्वास्थ्य निःशुल्क दिन लागिरहेको उनको भनाई छ।
कार्यक्रममा प्रधानमन्त्री कार्यालयका राज्य मन्त्री उमेश श्रेष्ठले क्यान्सर अस्पतालमा अन्य अस्पताललाई जोडेर प्रतिष्ठान बनाउनु पर्ने बताए। उहाँले भन्नुभयो “छाता ऐन बनाएर प्रतिष्ठान बनाउनु पर्छ।” क्यान्सर रोग लाग्न नदिन जनचेतनाका काममा जोड दिनुपर्ने भन्दै उहाँले यसै अस्पतालमा पेट स्क्यान मेसिन ल्याउनु पर्नेमा जोड दिए।
कार्यक्रममा अस्पतालका कार्यकारी निर्देशक डा.देजकुमार गौतमले अस्पतालको प्रगति विवरण र भावी योजनाबारे बताए।
