भरतपुर । बढ्दो सङ्क्रमण नियन्त्रणका लागि अन्य जिल्लामा निषेधाज्ञा, सवारीमा जोरबिजोर लागू भए पनि चितवनमा भने अझै केही दिन लागू नगरिने प्रमुख जिल्ला अधिकारी प्रेमलाल लामिछानेले बताएका छन् । उनले भने, ‘डराइहाल्नुपर्ने अवस्था आइसकेको छैन, तर पनि सबै नागरिक सचेत हुन जरूरी छ ।’

महानगर भएको ठाउँमा सक्रिय सङ्क्रमित १ हजार नाघेमा र अन्य ठाउँ उपमहानगर र नगरको हकमा पनि ५ सय कटेमा निषेधाज्ञा लगाउन सकिने भनिएकाले अहिले नै निर्णय लिइहाल्नुपर्ने अवस्था नरहेको जिल्ला कोभिड सङ्कट व्यवस्थापन केन्द्रका प्रमुखसमेत रहेका प्रजिअ लामिछानेले बताए । सवारीमा जोरबिजोर लागू गर्दा यात्रु उही संख्यामा हुने, तर सवारी घट्ने हुनाले थप भीडभाड हुने उनको भनाइ छ ।

कोरोना सङ्क्रमणको जोखिम सार्वजनिक यातायातमा उच्च रहेको भनी जिल्ला कोभिड सङ्कट व्यवस्थापन केन्द्र चितवन र जिल्ला ट्राफिक प्रहरी कार्यालयको संयोजनमा सार्वजनिक यातायातमा सचेतनामूलक स्टिकर टाँस गरिएको छ

सिट क्षमताभन्दा बढी यात्रु चढाउने, सबै यात्रुले अनिवार्यरुपमा मास्क लगाउने र मास्क नलगाएमा बढीमा दस रूपैयाँ लिई यात्रुलाई मास्क उपलब्ध गराउनुपर्ने तथा मास्क नलगाउनेलाई गाडीमा प्रवेश गर्न नदिने, गाडीमा स्यानिटाइजरको व्यवस्था गर्ने, गाडी निःसङ्क्रमण गर्नेजस्ता सचेतनामूलक स्टिकर टाँसिएको ट्राफिक प्रहरी प्रमुख प्रनि भगवान थापाले बताए ।

पत्रकार महासंघको अपिल

कोभिड–१९ सङ्क्रमणको दोस्रो लहर बढेको भन्दै सबै सञ्चारकर्मीहरुलाई सुरक्षित रही कर्तव्य पूरा गर्न महासंघ चितवन शाखाले अनुरोध गरेको छ । जिल्ला अध्यक्ष नारायण अधिकारीले सोमबार अपिल जारी गर्दै स्वास्थ्य सुरक्षालाई पहिलो प्राथमिकतामा राखेरमात्रै पेसागत कर्तव्य पूरा गर्न आमसञ्चारकर्मीलाई आग्रह गरिएको छ ।

सम्भव भएसम्म घरमै बसेर इमेल, मोबाइल, टेलिफोन, सामाजिक सञ्जाललगायत आधुनिक प्रविधिको उच्चतम प्रयोग गरी समाचार सम्प्रेषण गर्नसमेत भनिएको छ ।

‘प्रत्यक्ष नभेटी नहुने भएमा सामाजिक दूरी कायम गरौँ । सकभर आफ्नै सवारीसाधनमात्रै प्रयोग गरौँ । आफ्नो परिचयपत्र देखिने गरी लगाऔँ । सम्भव भएसम्म एउटै सञ्चारका सामग्री प्रयोग गरौँ, आफूले प्रयोग गरेका सञ्चार सामग्री अरुलाई नदिऔँ र अरुका सामग्री पनि आफूले नचलाऊँ । आफूले प्रयोग गरेका सामग्री नियमित स्यानिटाइज गरौँ’, अपिलमा भनिएको छ ।

उच्च सतर्कता अपनाउन आग्रह

भरतपुर महानगरपालिकाले कोरोना भाइरसको सङ्क्रमण बढिरहँदा सबै नगरवासीलाई उच्च सतर्कता अपनाउन आग्रह गरेको छ । महानगर प्रमुख रेनु दाहालद्वारा जारी गरिएको विज्ञप्तिमा सार्वजनिक स्थान, सडक, यातायात तथा कार्यालयहरुमा अनावश्यक भीडभाड नगर्न, भौतिक दूरी कायम गर्न र स्वास्थ्य मापदण्डका उपायहरु अवलम्बन गर्न आग्रह गरिएको छ । ‘स्वास्थ्य मापदण्डका उपायहरु अवलम्बन नगरेको पाइएमा सङ्क्रामक रोग ऐन २०२० बमोजिम कारबाही र सजाय हुनेछ’ विज्ञप्तिमा भनिएको छ ।